Mod Nvidia-nın RTX 50-yə özəl kadr yaratma funksiyasını RTX 40-a gətirib

    “Nvidia” şirkətinin yalnız “GeForce RTX 50” qrafik kartları üçün çıxardığı “Multi Frame Generation” funksiyası modla “GeForce RTX 40” seriyasında da işə salınıb. “dashdogy” adlı tərtibatçının hazırladığı həll “Cyberpunk 2077” oyununda yoxlanılıb. Sınaq funksiyanın “Ada Lovelace” arxitekturalı kartlarda həqiqətən işlədiyini göstərib. Bu texnologiya süni intellektlə əlavə kadrlar yaradır və görüntünü daha axıcı göstərir.

    Sınaq zamanı MFG rəsmi 2X səviyyəsindən yuxarı qaldırıldıqda hərəkətlər daha axıcı olub. Ancaq 4X və daha yüksək rejimlərdə ekranın aşağı hissəsində görüntü qüsurları yaranıb. Oxşar problemlər “GeForce RTX 50” kartlarında da görünür. Yüksək yenilənmə tezlikli monitor yoxdursa, funksiyanın üstünlüyü xeyli azalır.

    Sınaqlarda əsas diqqət giriş gecikməsinə yönəlib. Bu, düymənin basılması ilə ekranda cavabın görünməsi arasındakı vaxtdır. 1080p görüntü ölçüsündə MFG 4X rejimi bütün kartlarda 60 millisaniyə həddinin altında qalıb. “Blackwell” arxitekturalı “RTX 5070” hətta “RTX 4090”-dan daha az gecikmə göstərib. Qeyri-rəsmi DLSS 5 də aktivləşdirildikdə “RTX 4070 Super” və “RTX 4070” məqbul gecikmə həddini ciddi şəkildə keçib.

    2560x1440 görüntü ölçüsündə MFG 4X rejimində “RTX 4070” istisna olmaqla, bütün “Ada Lovelace” kartlarının gecikməsi məqbul səviyyədə qalıb. DLSS 5 də aktivləşdirildikdə yalnız “RTX 4090” 60 millisaniyə həddini keçməyib. “RTX 4080 Super” və “RTX 4080” bu həddə yaxın nəticə göstərib. 4K sınağında təkcə MFG 4X bütün kartlarda işlək nəticə verib. Gecikmə gözlənilmədən 1440p sınağından da aşağı olub. DLSS 5 əlavə ediləndə məqbul cavab sürəti əsasən “RTX 5090” və “RTX 4090”-da qeydə alınıb. “RTX 5080” isə sərhədə yaxın qalıb.

    Sınaqlara yalnız 12 GB yaddaşlı “RTX 4070” və daha güclü kartlar daxil edilib. Mod hələ hazırlanır və rəsmi həll qədər sabit deyil. “ReShade” proqramı tələb etməyən yeni versiya “Cyberpunk 2077” oyununda çökdüyünə görə yoxlanıla bilməyib. “Nvidia” rəsmi MFG dəstəyi ilə bağlı açıqlama verməyib. Bununla belə, DLSS 5 funksiyasının bu il “GeForce RTX 40” kartlarına gəlməsi planlaşdırılır.