Motorola şirkəti Moto G 5G (2023) adlı yeni orta büdcəli smartfonunu təqdim edib. Sözügedən yeni smartfon gündəlik istifadə üçün nəzərdə tutulmuş balanslaşdırılmış texniki göstəriciləri əldə edib. Belə ki, smartfon axıcı təsvirə sahib ekran, sürətli şarj texnologiyasına sahib batareya və yaxşı işıqlandırılmamış mühitdə çəkilişlər aparmağa imkan verən kamera ilə təchiz olunub. Ön paneldən Moto G 5G (2023) smartfonu 120 Hz-lik təsvir yenilənməsinə sahib 6.5 düym IPS ekran ilə təchiz olunub.

    Ekran yastı dizaynda reallaşdırılıb və onun yuxarı mərkəz hissəsində ön kamera üçün nəzərdə tutulmuş kiçik dairəvi çıxıntı yerləşdirilib. Smartfon özündə həmçinin Dolby Atmos dəstəkli stereo səsgücləndiriciləri və naqilli qulaqlıqlar üçün 3.5 mm-lik audiogirişi birləşdirir. Smartfonda kontaktsız ödənişlər üçün nəzərdə tutulmuş NFC çip mövcud deyil. Barmaq izi skanı texnologiyası isə smartfonun arxasındakı Motorola loqosuna inteqrasiya edilib.

    Əsas texniki göstəricilər baxımından Moto G 5G (2023) Snapdragon 480 prosessoru, 4 GB RAM, 128 GB daxili yaddaş həcmi (1 TB-a kimi microSD dəstəkli), 48 MP + 2 MP ikili arxa kamera, 8 MP-lik ön kamera və 15 vatt gücündə sürətli şarj texnologiyalı 5000 mAh enerji tutumlu batareya ilə təchiz olunub. Smartfon Android 13 vasitəsilə çalışır. Moto G 5G (2023) 25 may tarixində 250$ qiymətində satışa çıxacaq.