Motorola şirkəti yaxın zamanda Motorola Edge 40 adlı yeni subflaqman smartfonunu təqdim etməlidir. Evan Blass adlı məşhur insayder isə sözügedən smartfonun reklam fotolarını təqdim edib. Təqdim edilmiş fotolardan smartfonun dizaynını qiymətləndirmək olar. Görmək olar ki, smartfon ekranının kənar hissələri əyilmiş dizaynda reallaşdırılacaq. Ekranın yuxarı mərkəz hissəsində isə ön kamera üçün nəzərdə tutulmuş kiçik dairəvi çıxıntı yerləşəcək.

    Fotolardan birində arxa kamera sahəsi əks olunub və kamera sahəsində olan yazıya əsasən smartfonun əsas arxa kamerası 50 MP-lik olacaq. Son məlumat sızıntılarına əsasən Motorola Edge 40 smartfonu 144 Hz-lik təsvir yenilənməsinə sahib Full HD keyfiyyətli 6.55 düym AMOLED ekran ilə təchiz olunacaq. Smartfonun MediaTek Dimensity 8020 prosessoru vasitəsilə çalışacağı gözlənilir. Smartfon yaxın zamanda təqdim olunmalıdır.