Artıq müəyyən müddət ərzində internetdə gəzən məlumatlara əsasən Motorola şirkəti Edge 40 Neo adlı yeni smartfonu üzərində çalışır. İndi isə insayderlər sözügedən smartfonun yeni render fotosu təqdim ediblər və texniki göstəriciləri ilə satış qiymətini açıqlayıblar. Onların sözlərinə əsasən Motorola Edge 40 Neo 144 Hz-lik təsvir yenilənməsinə sahib Full HD+ keyfiyyətli 6.55 düym pOLED ekran ilə təchiz olunacaq. Smartfon MediaTek Dimensity 1050 prosessoru vasitəsilə çalışacaq.

    Smartfon özündə 12 GB RAM-ı, 256 GB daxili yaddaş həcmini və 68 vatt gücündə sürətli şarj texnologiyalı 5000 mAh enerji tutumlu batareyanı birləşdirəcək. Kameralara gəldikdə isə Motorola Edge 40 Neo 50 MP + 13 MP ikili arxa kameraya sahib olacaq. İnsayderlər bildiriblər ki, smartfonun gövdəsi IP68 standartı üzrə sudan qorunacaq və Android 13 əməliyyat sistemi vasitəsilə çalışacaq. Motorola Edge 40 Neo-nun bu ay ərzində təqdim olunacağı gözlənilir. İnsayderlərin təqdim etmiş olduqları məlumata inansaq, smartfon 399 avroya satılacaq.