Motorola ilk ağıllı saatını təqdim etdi

    Technote.az “The Verge” platformasına istinadən bildirir ki, Motorola CES 2026 sərgisində ilk ağıllı saatı olan Moto Watch modelini təqdim edib. Şirkətin açıqlamasına görə, bu Android ilə uyğun ağıllı saat 13 günə qədər batareya ömrü, Polar tərəfindən təmin olunan sağlamlıq izləmə texnologiyaları, iki tezlikli GPS və açıq mənbəli proqram təminatı ilə seçilir.

    Moto Watch-un ən diqqətçəkən xüsusiyyəti batareyasıdır. Motorola bildirir ki, 47 mm ölçülü saat bir şarjla 13 gün, Always-On OLED ekran aktiv olduqda isə təxminən 7 gün işləyə bilir. Bu göstəricilər təsdiqlənərsə, Moto Watch Apple Watch Series 11, Google Pixel Watch 4 və hətta Fitbit Charge 6 kimi modelləri batareya ömründə xeyli qabaqlayır. Sağlamlıq və fitnes izləmə sahəsində Motorola fərqli yol seçərək Polar ilə əməkdaşlıq edib. Polar texnologiyası sayəsində Moto Watch iki tezlikli GPS dəstəyi təqdim edir. Bu xüsusiyyət Pixel Watch 4-də yeni tətbiq edilsə də, Apple Watch Series 11-də hələ mövcud deyil.

    Moto Watch addım sayı, məsafə, davamlı ürək döyüntüsü və yuxu izləmə kimi əsas funksiyalarla yanaşı, daha dərin analizlər də təqdim edir. Nightly Recharge gecə ərzində bədənin stressə reaksiyasını qiymətləndirərək növbəti gün üçün istirahət və ya aktivlik tövsiyələri verir. Activity Score məşqin effektivliyini ölçür, Smart Calories isə gün ərzində və məşq zamanı yandırılan enerjini detallı şəkildə analiz edir. Bundan əlavə, su içmə və dərman xatırlatmaları da mövcuddur. Proqram təminatı baxımından Moto Watch klassik Wear OS istifadə etmir. Saat açıq mənbəli proqram təminatı üzərində işləyir, lakin Motorola hələlik bu sistemin detalları barədə geniş məlumat paylaşmayıb.