Motorola-nın yeni Razr flip telefonu internetə sızdı

    Technote.az “Mashable” platformasına istinadən bildirir ki, Motorola 2026-cı il üçün qatlana bilən smartfon strategiyasını genişləndirməyə davam edir. Şirkətin yalnız bir deyil, iki fərqli qatlanan model üzərində işlədiyi məlum olub. Bunlardan biri kitab formasında açılan yeni Razr Fold, digəri isə klassik flip dizaynlı növbəti Razr seriyası modelidir.

    Məşhur insayder Evan Blass tərəfindən paylaşılan render görüntülərinə əsasən, Motorola-nın yeni Razr flip smartfonu internetə sızdırılıb. Hələlik cihazın texniki xüsusiyyətləri açıqlanmasa da, yayımlanan görüntülərdən telefonun dörd fərqli rəng seçimi ilə təqdim olunacağı və arxa panelində maraqlı tekstura dizaynlarının istifadə ediləcəyi görünür. Dizayn baxımından model ötən ilin Razr seriyasına bənzər xətti davam etdirir.

    Digər tərəfdən Motorola bu ilin əvvəlində CES 2026 sərgisində təqdim etdiyi kitab tipli qatlanan Razr Fold modelini artıq Avropada satışa çıxarmağa hazırlaşır. Cihaz hazırda Böyük Britaniyada ön sifariş üçün açılıb. Razr Fold-un Avropadakı qiyməti 1999 avro, Böyük Britaniyada isə 1799.99 funt sterlinq təşkil edir.

    Motorola hələlik Razr Fold-un ABŞ və digər bazarlarda nə vaxt satışa çıxacağını açıqlamayıb. Bununla belə, ABŞ istifadəçiləri artıq cihaz üçün qeydiyyatdan keçə bilirlər. Qeyd edək ki, qatlanan smartfon bazarı son illərdə sürətlə böyüyür. Hazırda bazarın liderlərindən biri olan Samsung-un da bu il Galaxy Z Flip 8, Galaxy Z Fold 8 və yeni Wide Fold modelini təqdim edəcəyi gözlənilir. Apple isə hələ də ilk qatlanan iPhone modeli üzərində çalışır. Məlumatlara görə, uzun müddətdir gözlənilən iPhone Fold bu ilin sonuna qədər təqdim oluna bilər.