NASA və LEGO yeni Artemis II raket dəstini təqdim edib

    Technote.az “Mashable” platformasına istinadən bildirir ki, NASA və LEGO yeni Artemis II raket dəstini təqdim edib. Ay ətrafında uğurla həyata keçirilmiş Artemis II missiyasının ardından təqdim olunan yeni kolleksiya dəsti kosmos həvəskarları üçün xüsusi olaraq hazırlanıb. 632 hissədən ibarət olan bu LEGO modeli NASA və Avropa Kosmik Agentliyi (ESA) ilə əməkdaşlıq çərçivəsində hazırlanıb və Artemis kosmik proqramının əsas raket sistemi olan Space Launch System-i miniatür formada canlandırır.

    Dəstin əsas xüsusiyyətlərindən biri onun interaktiv quruluşudur. Modelə əlavə edilmiş xüsusi əl mexanizmi vasitəsilə istifadəçilər raketin üç mərhələli buraxılış prosesini imitasiya edə bilirlər. Sadəcə olaraq xüsusi qolu çevirməklə raketin havaya qalxmasını və yan gücləndirici mühərriklərin ayrılmasını vizual şəkildə izləmək mümkündür. LEGO dəstinə həmçinin Artemis II missiyasının dörd nəfərlik heyətini simvolizə edən dörd mini astronavt fiquru da daxildir. Bununla yanaşı, məhsul paketində missiya haqqında məlumat verən xüsusi informasiya lövhəsi də təqdim olunur.

    Şirkətin açıqlamasına görə, dəst 9 yaş və daha yuxarı istifadəçilər üçün nəzərdə tutulsa da, məhsulun böyük LEGO kolleksiyaçıları və kosmos həvəskarları arasında da ciddi maraq gördüyü bildirilir. Qeyd edək ki, məhsulun satışa çıxarılmasından qısa müddət sonra yüksək tələbat səbəbilə Amazon, Walmart və rəsmi LEGO mağazasında stoklar tükənib. Hazırda sifarişlər qəbul edilsə də, yeni partiyanın təxminən 60 gün ərzində çatdırılacağı bildirilir.

    Əlavə olaraq, istifadəçilər üçün quraşdırma prosesini asanlaşdırmaq məqsədilə LEGO-nun Builder mobil tətbiqi vasitəsilə interaktiv 3D təlimatlar da təqdim edilir. Tətbiq həm iOS, həm də Android platformalarında əlçatandır.