Nazik gövdəli iPhone 17 Air böyük ölçülü ekranı əldə edə bilər

     Bu ilin ikinci yarısında təqdimatı gözlənilən nazik gövdəli iPhone 17 Air daha böyük ölçülü ekrana sahib ola bilər. Recycle Bin podkastında Məşhur insayder Jon Prosser bildirib ki, yeni model 6.7 düym ölçülü ekranla təchiz ediləcək, halbuki əvvəlki məlumatlara görə bu 6.6 düym ölçülü ekran olmalı idi. Keçən il analitik Ross Young qeyd etmişdi ki, iPhone 17 Air-in ekran ölçüsü ya 6.55 düym, ya da 6.6 düym olacaq.

     İndi isə dəqiq ölçünün 6.6, yoxsa 6.7 düym olduğu məlum deyil. Bundan əlavə, Prosser iddia edir ki, iPhone 17 Air-in qalınlığı arxa kameranı nəzərə almasaq, 5.64 mm təşkil edəcək. Bundan əvvəl məşhur analitik Ming-Chi Kuo smartfonun minimum qalınlığının cəmi 5.5 mm olacağını bildirmişdi. Bu səbəbdən, 5.64 mm qalınlıq real görünür. Jon Prosser texnologiya dünyasında Front Page Tech kanalının aparıcısı kimi tanınır.

     Onun Apple ilə bağlı proqnozları qarışıq nüfuza malikdir - bəzən doğru çıxır, bəzən isə yanılır. Məsələn, 2020-ci ildə o, AirTag-in dizaynını rəsmi elanından bir neçə ay əvvəl ilk dəfə açıqlayan şəxs olub. Həmçinin iPad mini 6 haqqında bir çox dəqiq detallar təqdim edib. Lakin Apple Watch Series 7-nin düz kənarlı dizaynı ilə bağlı verdiyi proqnoz səhv çıxıb, baxmayaraq ki, ola bilər ki, Apple həmin dizaynı test edirdi. Bundan əlavə, o iddia edir ki, iOS 19-un kamera interfeysi yenilənəcək və visionOS-a bənzəyəcək.

Mənbə: Macrumors