Netflix Böyük Britaniyada ilk dəfə BBC-ni geridə qoydu

    Böyük Britaniyada insanların televiziya və video məzmun seçimlərində ciddi dəyişiklik yaşanır. Ölkənin rabitə və media tənzimləyicisi Ofcom-un yeni hesabatına görə, Netflix ilk dəfə BBC-ni geridə qoyaraq britaniyalı tamaşaçıların əsas məzmun seçiminə çevrilib. Ofcom-un sorğusuna əsasən, respondentlərin 26 %-i video məzmun izləmək istədikdə ilk seçim kimi Netflix-ə müraciət edəcəyini bildirib. BBC-ni seçənlərin göstəricisi 25 %, ITV-ni seçənlərin payı isə 15 % təşkil edib. Beləliklə, Netflix ilk dəfə bu göstəricidə BBC-ni qabaqlayıb.

    Araşdırma müxtəlif yaş qruplarının seçimləri arasında da böyük fərq olduğunu göstərir. Netflix xüsusilə 25-34 yaşlılar arasında əsas seçimə çevrilib. Daha yaşlı tamaşaçılar ənənəvi televiziya kanallarına üstünlük verməyə davam etdiyi halda, 16-24 yaşlılar arasında YouTube daha populyardır. Ofcom-un məlumatına görə, Böyük Britaniyada YouTube-da keçirilən vaxt 2022-ci illə müqayisədə iki dəfə artıb. Hazırda britaniyalılar bütün cihazlar nəzərə alınmaqla YouTube-da gündə orta hesabla 41 dəqiqə vaxt keçirirlər. Maraqlısı odur ki, platformanın istifadəsi 75 yaşdan yuxarı insanlar arasında da artır.