Netflix “cast” funksiyasını deaktiv edib

    Technote.az "The Verge" platformasına istinadən bildirir ki, Netflix artıq istifadəçilərin telefon vasitəsilə film və ya serialı televizora ötürməsinə imkan vermir. Android Authority-nin aşkar etdiyi və Netflix-in yenilənmiş yardım səhifəsində qeyd olunan məlumata görə, xidmət kontenti birbaşa televizorun öz pultu ilə açmağı tövsiyə edir.

    Bu dəyişiklik son həftələrdə tətbiq olunub. Bir Reddit istifadəçisi bildirib ki, funksiyaya 10 noyabr tarixində tamamilə xəbərdarlıq edilmədən son verilib. Digər istifadəçilər də qeyd edir ki, köhnə Netflix tətbiqində "cast etmək" mümkün olsa da, tətbiq yeniləndikdən sonra seçim yoxa çıxır.

    Hazırda yalnız köhnə Chromecast cihazları və ya daxilində Google Cast dəstəyi olan bəzi televizorlarda bu funksiya hələlik işləyir. Lakin bu da yalnız daha bahalı reklamsız Netflix planına (aylıq 17.99 dollar) abunə olanlar üçün keçərlidir. Reklamlı plan istifadəçiləri (aylıq 7.99 dollar) isə hətta köhnə Chromecast qurğularına sahib olsalar belə cast funksiyasından istifadə edə bilməyəcəklər. Netflix bu funksiyanı niyə ləğv etdiyini açıqlamayıb. Şirkət 2019-cu ildə də AirPlay dəstəyini dayandırmış və səbəb olaraq tamaşa keyfiyyətinin standartlara uyğun təmin edilməsini göstərmişdi.