Netflix internetin məşhur video məzmunlarını öz platformasında təqdim edəcək

    Netflix avqustun 3-dən etibarən platformasında onlarla tanınmış rəqəmsal media brendinin video məzmununu təqdim etməyə başlayacaq. Yeni razılaşma sayəsində istifadəçilər artıq BuzzFeed, Conde Nast, Hearst Magazines, People Inc və Tastemade kimi nəşrlərin videolarını birbaşa Netflix üzərindən izləyə biləcəklər.

    Razılaşmaya həm əvvəllər yayımlanmış lisenziyalı videolar, həm də normalda YouTube və digər onlayn platformalarda paylaşılması nəzərdə tutulan yeni serial formatlı məzmunlar daxildir. Bunların arasında Architectural Digest-in məşhur Open Door və Vanity Fair-ın Lie Detector Test kimi layihələri də yer alır.

   Netflix bildirir ki, məqsəd istifadəçilərə “internetdəki maraqlı məzmunu Netflix-dən çıxmadan izləmək” imkanı yaratmaqdır. Şirkətin bu addımı son günlərdə yayılan və bəzi Netflix seriallarının ikinci mövsümlərinin ilk mövsümlə müqayisədə izləyici sayında 70 faizə qədər azalma yaşadığını göstərən hesabatdan sonra diqqət çəkir.

    Platformaya əlavə olunacaq videoların müddəti təxminən 3–20 dəqiqə arasında dəyişəcək. Məzmunlar yemək, səyahət, moda, əyləncə, dizayn, sağlam həyat tərzi və digər mövzuları əhatə edəcək. Netflix gələcəkdə daha çox rəqəmsal media tərəfdaşının da platformaya qoşula biləcəyini qeyd edib.