Netflix Sony ilə yeni çoxillik razılaşma imzaladı

    Technote.az “Engadget” platformasına istinadən bildirir ki, Netflix və Sony Pictures Entertainment arasında yeni, genişləndirilmiş əməkdaşlıq razılaşması elan edilib. Bu razılaşmaya əsasən, Sony-yə məxsus filmlər kinoteatr və VOD (ödənişli izləmə) mərhələsindən sonra ilk olaraq Netflix-də yayımlanacaq.

    Razılaşma Netflix-in ABŞ-də Sony filmləri üçün artıq mövcud olan eksklüziv hüquqlarını qlobal miqyasda genişləndirir. Beləliklə, tamaşaçılar canlı çəkilişlə hazırlanan “The Legend of Zelda” filmi və The Beatles qrupunun üzvləri haqqında çəkiləcək dörd bioqrafik filmi ilk dəfə Netflix-də izləyə biləcəklər.

    Sony filmləri “Pay-1” adlanan mərhələdə, yəni filmin kinoteatr və VOD satışlarından sonrakı ilk yayım pəncərəsində bütün dünyada Netflix platformasında təqdim olunacaq. Bundan əlavə, Netflix Sony Pictures-in arxivindən (back catalog) açıqlanmayan sayda film və serialın yayım hüququnu da əldə edəcək.

    Netflix bildirir ki, bu yeni razılaşma hüquqların mövcudluğuna uyğun olaraq mərhələli şəkildə tətbiq olunacaq və tam şəkildə 2029-cu ilə qədər qüvvəyə minəcək. Müqavilənin dəqiq müddəti açıqlanmasa da, tərəflər bunu “çoxillik razılaşma” adlandırır.

     Variety nəşrinin məlumatına görə, Netflix bu yeni razılaşma çərçivəsində Sony-yə 7 milyard dollardan çox vəsait ödəyəcək. Netflix-in Universal ilə də oxşar müqaviləsi mövcuddur və bu əməkdaşlıq sayəsində The Super Mario Bros. Movie kimi Nintendo adaptasiyaları da platformaya əlavə olunub.

    Eyni zamanda, Netflix-in daha böyük planları da gündəmdədir. Şirkətin Warner Bros. Discovery-ni 82,7 milyard dollara almaq istədiyi bildirilir. Bu razılaşmanın qarşısını almaq üçün isə Paramount, Warner Bros. Discovery-ni məhkəməyə verib.