Nintendo-dan maraqlı yenilik: Öz şəkillərinizlə oyun oynaya biləcəksiniz

    Nintendo mobil cihazlar üçün hazırladığı yeni "Pictonico!" oyunu ilə oyunçulara qeyri-adi təcrübə təqdim edir. İlk baxışda WarioWare üslubunu xatırladan oyunun əsas fərqi ondan ibarətdir ki, burada mikrooyunların əsas personajları istifadəçilərin öz şəkilləri olur. Oyunda istifadəçilər telefon qalereyasındakı fotolardan və ya tətbiq daxilində çəkilən şəkillərdən istifadə edə bilirlər. Sistem əsasən insan üzlərini tanıyaraq onları müxtəlif əyləncəli və bəzən də absurd görünən mini oyunların bir hissəsinə çevirir.

    Nintendo bildirir ki, istifadəçilərin şəkilləri şirkətin serverlərinə göndərilmir və bütün məlumatlar yalnız cihazın özündə saxlanılır. Bundan əlavə, oyunçular hansı albomdakı şəkillərin istifadə olunacağını özləri seçə bilirlər. Pictonico! pulsuz yüklənsə də, yalnız qısa demo versiyası ödənişsizdir. Demo tamamlandıqdan sonra əlavə oyun paketləri satın alınmalıdır. Birinci paket 20 mərhələdən ibarətdir və 8 dollar, ikinci paket isə 12 mərhələ təqdim edir və 6 dollara satılır.