NorthWestRepair YouTube kanalı 27 200 manatlıq 2 yaddaş modulunu təmir etdi

    “NorthWestRepair” adlı “YouTube” kanalı ilk RAM təmiri videosunda dəyərinin 16 000 dollar (təxminən 27 200 manat) olduğu deyilən yaddaş modullarını işlək hala qaytarıb. Söhbət 2 DDR5 modulundan gedir. Modullardan biri 128 GB, digəri isə 256 GB yaddaş tutumundadır. Hər ikisi serverlər üçün hazırlanmış ECC yaddaşdır. ECC texnologiyası məlumatlarda yaranan xətaları aşkarlayıb düzəldə bilir.

    Modullar fiziki zədə qeydi ilə Tony adlı mütəxəssisə göndərilib. İlk baxış zamanı nasazlığın dəqiq səbəbi bilinməyib. Mütəxəssis server yaddaşını yoxlamaq üçün “Unified DDR Flasher Main Board” cihazından və onun RDIMM adapterindən yararlanıb. Məlumat xətlərinin sınağında da problem aşkarlanmayıb.

    İlk modulun lehimlənmiş hissələri xüsusi maye və isti hava ilə yenidən qızdırılıb. Bu üsulda yaddaş çiplərini lövhədən çıxarmağa ehtiyac qalmır. Daha mürəkkəb təmir zamanı bütün çiplər sökülür və təmizlənir. Sonra onların altına yeni lehim kürəcikləri qoyulur. İlkin sınaqlar sadə müdaxilədən sonra ilk modulun normal işlədiyini göstərib.

    İkinci modulda problem daha ciddi olub. Mütəxəssis enerji axınını idarə edən PMIC çipinin sıradan çıxdığından şübhələnib. Yaddaş sistemə qoşulanda heç bir reaksiya verməyib, termal kamera da modulun isinmədiyini göstərib. Gərginliklə aparılan yoxlamada qısaqapanma aşkarlanıb. Kondensator yenisi ilə əvəzlənib, PCB adlanan elektron lövhənin zədələnmiş kənarı bərpa olunub və PMIC çipi dəyişdirilib. Bundan sonra modul uğurla işə düşüb.

    Təmir sayəsində hər iki yüksək tutumlu yaddaş modulu elektron tullantıya çevrilməyib. Əvvəllər RAM modulunu təmir etdirmək sərfəli sayılmırdı, çünki yenisini almaq təxminən eyni məbləğə başa gəlirdi. Ancaq 2026-cı ildə süni intellekt sektorunda yüksək tutumlu yaddaşa tələbin artması qiymətləri yüksəldib. Buna görə bir neçə yüz dollarlıq təmir bahalı server yaddaşını yenisi ilə əvəzləməkdən daha münasib ola bilər.