Nothing Phone 4a rəsmi təqdimat tarixini açıqladı

    Technonte.az “Mashable” platformasına istinadən bildirir ki, Nothing şirkəti yeni büdcə smartfon seriyasının təqdimat tarixini rəsmi olaraq açıqlayıb. Şirkət bu il Barselonada keçiriləcək Mobil Dünya Konqresi (MWC 2026) çərçivəsində yeni Nothing Phone 4a seriyasını təqdim edəcək.

    Tədbir texniki olaraq MWC həftəsinə təsadüf etsə də, təqdimat Londonda keçiriləcək. Rəsmi tədbir martın 2–5 tarixlərində baş tutacaq sərgi dövründə, saat 10:30 GMT-də (Bakı vaxtı ilə 14:30) başlayacaq və Nothing-in rəsmi saytı üzərindən canlı yayımlanacaq. Dəvət məktubunda “something new is coming” şüarı istifadə olunsa da, böyük sirr yoxdur. Şirkət açıq şəkildə bunun Nothing Phone 4a seriyası ilə bağlı tədbir olduğunu bildirib.

    Xatırladaq ki, Nothing ötən il MWC zamanı Nothing Phone 3a və Nothing Phone 3a Pro modellərini təqdim etmişdi. Hər iki model böyük ekran, iri batareya və şirkətə məxsus unikal proqram təminatı xüsusiyyətləri ilə seçilən, münasib qiymətli orta seqment smartfonlar idi. Yeni modellərlə bağlı hələlik texniki detallara dair rəsmi məlumat paylaşılmayıb. Lakin gözləntilərə görə, Nothing Phone 4a və 4a Pro modelləri Snapdragon 7 seriyalı prosessorlarla təchiz olunacaq. Şirkət ənənəvi minimalist və monoxrom dizayn xəttini qorusa da, yeni modellərin bir neçə rəng seçimində təqdim ediləcəyi ehtimal olunur.