Nvidia DLSS 4.5 yeniləməsini təqdim etdi

    Technote.az “The Verge” platformasına istinadən bildirir ki, Nvidia DLSS (Deep Learning Super Sampling) texnologiyasının növbəti böyük yeniləməsi olan DLSS 4.5-i rəsmi şəkildə istifadəyə verib. Yeni versiya süni intellekt əsaslı kadr generasiya (frame generation) imkanlarını genişləndirərək, uyğun GeForce RTX qrafik kartları üçün həm performansı, həm də görüntü keyfiyyətini artırmağı hədəfləyir.

    Bu yeniləmə Nvidia tətbiqinin beta versiyası ilə birlikdə təqdim olunur və artıq 20-dən çox oyunda istifadəçilərə daha yüksək performans və daha axıcı oyun təcrübəsi vəd edir. DLSS 4.5-in ən diqqətçəkən xüsusiyyəti RTX 50 seriyalı GPU-lar üçün təqdim edilən 6x Multi Frame Generation texnologiyasıdır. Nvidia-nın bildirdiyinə görə, bu sistem ikinci nəsil transformer əsaslı AI modelindən istifadə edərək hər bir real render edilmiş kadr üçün əlavə olaraq 5 yeni kadr yaradır. Bu isə əvvəlki DLSS 4-də maksimum 3 əlavə kadr limiti ilə müqayisədə ciddi irəliləyiş sayılır və eyni zamanda gecikməyə minimum təsir göstərir.

    Bundan əlavə, yeniləməyə daxil edilən Dynamic Frame Generation funksiyası GPU üçün “avtomatik ötürücü sistemi” kimi işləyir. Bu texnologiya oyun zamanı kadr generasiya səviyyələrini avtomatik tənzimləyərək performans, görüntü keyfiyyəti və cavab reaksiyası arasında optimal balans yaradır. İstifadəçilər bu funksiyanı həm fərdi oyunlar üçün, həm də bütün oyunlar üzrə aktiv edə bilərlər.

   DLSS 4.5 həmçinin RTX 40 və RTX 50 seriyalı kartlar üçün yeni Frame Generation modeli də təqdim edir. Bu model oyun daxilində mini xəritə və digər interfeys elementlərinin daha aydın və stabil görünməsini təmin edir. Yeniləmə ilə birlikdə DLSS 4.5 Super Resolution texnologiyası da genişləndirilib. “ARC Raiders” və “Marvel Rivals” oyunları artıq bu texnologiyanı dəstəkləyən oyunlar siyahısına əlavə olunub.