Nvidia iyul ayında başladığı gəlir paylaşımı proqramının bir hissəsini dayandırıb

     Nvidia süni intellekt şirkətlərinə çiplərini almaq üçün maliyyə dəstəyi göstərdiyi və həmin çiplərin sonradan yaratdığı gəlirdən pay aldığı yeni maliyyələşdirmə proqramı çərçivəsində bəzi əməliyyatları dayandırıb.

     “Wall Street Journal”ın məlumatına görə, şirkət proqramı cəmi səkkiz həftə əvvəl, iyulun 1-də təqdim etmişdi. Bu model Nvidia üçün adi çip satışından fərqli olaraq bir neçə gəlir mənbəyi yaradır. Şirkət əvvəlcə çipləri müştəriyə satır, daha sonra müştərinin sata bilmədiyi hesablama gücünü icarəyə götürməyi təmin edir və həmin çiplərin yaratdığı bulud gəlirlərindən də pay alır.

   Məlumata görə, Nvidia daxilində proqramla bağlı iki əsas narahatlıq yaranıb. İşçilər ilk növbədə bu modelin şirkətin bazardakı mövqeyi səbəbilə antitrest araşdırmalarına səbəb ola biləcəyini bildiriblər. Digər narahatlıq isə Nvidia-nın müştərilərinin bizneslərini nə dərəcədə idarə edə və onlara şərtlər diktə edə biləcəyi ilə bağlı olub.

    Şirkət proqram çərçivəsində hansı şirkətlərin çipləri icarəyə götürə biləcəyinə də müəyyən məhdudiyyətlər qoyurdu. Nvidia hesablama gücünün bir böyük müştərinin əlində cəmlənməsi əvəzinə, bir neçə kiçik süni intellekt şirkəti arasında bölüşdürülməsinə üstünlük verirdi. Bəzi tərəfdaşlar isə bu şərtlərin gözlədiklərindən daha məhdudlaşdırıcı olduğunu bildiriblər.

    Nvidia proqramın dayandırıldığını rəsmi şəkildə təsdiqləməyib. Bununla belə, şirkət proqramın mövcudluğunu da təkzib etməyib. Nvidia nümayəndəsi bildirib ki, iyul ayında təqdim edilən yeni biznes modeli hələ də qüvvədədir və yüksək tələbat səbəbilə inkişaf etdirilir.

    “Wall Street Journal”ın məlumatına əsasən, Nvidia proqramın şərtlərini dəyişdirməyi və ya onu mövcud maliyyələşdirmə proqramlarından birinə daxil etməyi nəzərdən keçirir.