OnePlus 12R-in keyfiyyətli render fotoları təqdim edilib

    OnLeaks ləqəbli məşhur insayder gələn ilin əvvəlində təqdim olunacağı gözlənilən OnePlus 12R smartfonunun render fotolarını təqdim edib. Daha öncəki OnePlus R modelləri kimi OnePlus 12R də əsas flaqman modelin bir qədər sadələşdirilmiş versiyası rolunda çıxış etməlidir. Fotolardan görmək olar ki, OnePlus 12R smartfonu xarici görünüşcə OnePlus 11-ə və bu ilin sonunda təqdim ediləcək OnePlus 12-yə bənzəyir. Bununla belə OnePlus 12R-in ekranının kənar hissələri bir qədər əyilmiş dizaynda reallaşdırılacaq.

    Smartfonun arxa kamera sahəsinin dizaynı OnePlus 11 və OnePlus 11R-də olan arxa kamera sahəsinin dizaynına bənzəyir. Bəzi məlumatlara əsasən OnePlus 12R smartfonu 120 Hz-lik təsvir yenilənməsinə sahib 1.5K keyfiyyətli 6.7 düym AMOLED ekran ilə təchiz olunacaq. Smartfon Snapdragon 8 Gen 2 prosessoru vasitəsilə çalışmalı və özündə 16 GB-a kimi RAM-ı, 256 GB-a kimi daxili yaddaş həcmini və 100 vatt gücündə sürətli şarj texnologiyalı 5500 mAh enerji tutumlu batareyanı birləşdirməlidir.