Qlobal bazarda OnePlus 11R kimi tanınan OnePlus Ace 2 smartfonu alıcılar arasında sürətlə məşhurlaşdı. Belə ki, sözügedən smartfon özündə Snapdragon 8+ Gen 1 prosessorunu və flaqman dizaynını birləşdirməklə yanaşı aşağı satış qiymətinə də sahibdir. Görünür, OnePlus Ace 2-nin yüksək satışları səbəbilə şirkət onun təkmilləşdirilmiş versiyası üzərində çalışır. Digital Chat Station ləqəbli məşhur insayderin verdiyi məlumata əsasən OnePlus şirkəti hal hazırda OnePlus Ace 2 Pro smartfonunu hazırlayır

    Onun sözlərinə əsasən yeni smartfonun OnePlus Ace 2-dən əsas fərqi onda olacaq ki, OnePlus Ace 2 Pro modeli Snapdragon 8 Gen 2 prosessoru vasitəsilə çalışacaq. Bununla yanaşı insayder qeyd edib ki, smartfon 1.5K keyfiyyətli ekran ilə təchiz olunacaq. OnePlus Ace 2 Pro-nun nə zaman təqdim olunacağı bilinmir. Lakin bunun yay fəslində baş tutacağı istisna deyil. Nəticə etibarilə OnePlus Ace 2 Pro qlobal bazarda OnePlus 11T adı ilə satışa çıxa bilər.