OpenAI və io tərəfindən hazırlanan süni zəka əsaslı cihaz taxıla bilən olmayacaq

     Bir neçə müddət bundan öncə məlum oldu ki, OpenAI və io startapları eşitmə cihazları istehsalçısı Iyo tərəfindən məhkəməyə verilib. Məhkəmə prosesinə hazırlıq çərçivəsində sənəd mübadiləsi artıq açıq şəkildə başladığı üçün süni zəka ilə işləməyə yönəlmiş gələcək cihazla bağlı bəzi təfərrüatları öyrənmək mümkün olub. Eşitmə cihazları istehsalçısının iddiaları ilə üzləşən, Apple-ın keçmiş baş dizayneri Jony Ive-ın təsis etdiyi io startapı məhkəmə üçün təqdim etdiyi arqumentlərdə bildirib ki, OpenAI ilə birlikdə hazırlanan cihaz nə taxıla bilən olacaq, nə də qulaqda daşınmaq üçün nəzərdə tutulub. Bundan əlavə, həmin cihaz bazara 2026-cı ildən tez çıxmayacaq.

     Belə bir cihazın tam funksional və seriyalı istehsal versiyasını yaratmaq üçün ən azı 1 il vaxt lazım olacaq və cihazın dizaynı hələ də tam təsdiqlənməyib. Xatırladaq ki, Iyo şirkətinin məhkəmə iddiası səbəbindən OpenAI və io şirkətləri OpenAI-nin rəsmi saytından əməkdaşlıqla bağlı istinadları, eləcə də şirkətin rəhbəri Sam Altman-ın Jony Ive ilə əməkdaşlıq perspektivlərini müzakirə etdiyi videonu silmək məcburiyyətində qalıblar. İddiaçı tərəf bildirir ki, cavabdehlər daxili yazışmalarda həmin cihazı “dünyanın ilk audio-kompüteri” adlandırıblar və io ilə OpenAI-nin Iyo-nun məhsuluna rəqib bir cihaz yaratmağa cəhd etdiklərindən, üstəlik, oxşar ticarət nişanından istifadə etdiklərindən şübhələnirlər.

     OpenAI etiraf edir ki, öz cihazlarını hazırladıqları müddətdə io şirkəti bir sıra xarici məhsullar alıb, onların dizaynını və funksiyalarını öyrənib. Bu məhsullar arasında 30-a yaxın fərqli istehsalçıya məxsus qulaqcıqlar da olub. Eyni zamanda, ilkin ideya və prototip mərhələsində io müxtəlif formalı və ölçülü cihazların - masaüstü və mobil versiyaların - hazırlanmasını nəzərdən keçirib. İddiaçı tərəf həmçinin Altman ilə əməkdaşlıq təklifi barədə yazışmalara istinad edir. Həmin yazışmalarda Altman bu təklifi rədd edir və rəqabətli bir şey üzərində işlədiklərini qeyd edir. Bununla da, Iyo nümayəndələrinin fikrincə, io və OpenAI guya cihazın dizayn və funksionallığını Iyo-dan götürərək, rəqib bir məhsul hazırlamağı planlaşdırıblar.