Oppo F35 smartfon seriyasını Hindistanda təqdim edəcəyini təsdiqlədi

    “Oppo” şirkəti “F35” seriyasını Hindistanda təqdim edəcəyini rəsmən təsdiqləyib. Şirkətin açıqlamasına görə, “Oppo F35” seriyası tezliklə Hindistanda təqdim olunacaq. Ancaq tədbirin dəqiq tarixi, seriyaya neçə smartfonun daxil olacağı və satışların nə vaxt başlayacağı hələ açıqlanmayıb. Avqustda cihazların “Find X9s Pro” ilə birlikdə göstəriləcəyi deyilirdi, lakin “Oppo” bu məlumatı təsdiqləməyib.

    İndiyədək yayılan məlumatlara əsasən, seriyaya ən azı 2 model - “Oppo F35 Pro” və “F35 Pro Max” daxil ola bilər. Bununla belə, smartfonların yekun adları fərqli ola bilər. “Oppo”-nun tanıtım şəkillərində cihazların yalnız silueti görünür. Buna görə modellərin sayı və dizaynı barədə dəqiq məlumat yoxdur.

    Əvvəlki məlumatlarda “F35 Pro Max” modelinin başqa adla təqdim ediləcək “Oppo A7 Pro Max” olduğu iddia edilirdi. Bu məlumat doğru olarsa, smartfon 6,78 düymlük 1272p+ OLED ekran və “Snapdragon 4 Gen 5” prosessorla gələcək. Ekranın 120 Hz yenilənmə tezliyi menyuda keçidləri və animasiyaları daha axıcı göstərəcək. 10 bit rəng dəstəyi isə daha çox rəng çalarının göstərilməsinə imkan verəcək. IP68 və IP69K qoruma standartları cihazın suya və toza davamlılığını artıracaq.

    Modelin əsas xüsusiyyətlərindən birinin 10 000 mAh tutumlu silikon-karbon batareya olacağı gözlənilir. Batareya 80 Vt naqilli sürətli şarjı dəstəkləyəcək. 27 Vt əks şarj funksiyası ilə başqa cihazları da enerji ilə doldurmaq mümkün olacaq. Məlumata görə, ön tərəfdə avtofokuslu, 18 mm fokus məsafəli, f/2.0 diafraqmalı və geniş görüntü bucağına sahib 50 MP selfi kamerası yerləşəcək. Arxa kameranın da 50 MP təsvir ölçüsündə olacağı bildirilir.

    “Oppo A7 Pro” hələ rəsmən təqdim edilməyib. Smartfonun bu həftə Çində göstəriləcəyi gözlənilir. İlkin məlumatlara görə, model 8000 mAh batareya, IP69K qoruması və OLED ekranla gələcək. “Oppo” daha əvvəl, aprel ayında “F33” və “F33 Pro” modellərini təqdim etmişdi. “Oppo A6” seriyası əsasında hazırlanan bu 2 smartfonun hər birində 7000 mAh batareya və avtofokuslu, geniş görüntü bucağına sahib 50 MP selfi kamerası vardı.