Packard Bell 13 ildən sonra 499 avroluq narıncı noutbukla qayıtdı

    “Packard Bell” 13 illik fasilədən sonra “IFA 2026” sərgisində yeni cihazlarla geri qayıdıb. “Acer” şirkəti brendin “Dot” məhsul ailəsini və onun əsas modeli olan “DotBook 14” noutbukunu təqdim edib. Yeni seriya münasib qiymətli və rəngarəng cihazlar axtaran alıcılara hesablanıb. Məhsullar hələlik yalnız Avropa bazarında satılacaq.

    “DotBook 14” 14,5 düymlük IPS ekranla təchiz olunub. Ekran 1920 x 1200 piksel təsvir ölçüsünə və 300 nitədək parlaqlığa sahibdir, buna görə mətn və görüntülər aydın görünür. Noutbukda “Twin Lake” platformalı 8 nüvəli “Intel Core 3 N355” prosessoru və inteqrasiya edilmiş “Intel Graphics” qrafikası işləyir. Prosessorun tezliyi 3,9 GHz-dək yüksəlir. Yaddaş seçimi 16 GB-dək DDR4 RAM və 512 GB-dək daxili yaddaşı əhatə edir.

    Noutbukun 45,6 Vt/saat tutumlu, 6000 mAs batareyası bir şarjla 7 saatadək işləməyə imkan verir. Model 1,3 kq ağırlığındadır və qalınlığı təxminən 17,9 mm təşkil edir. Qoşulma imkanlarına 1 USB-C, 3 adi USB girişi, HDMI 1.4, MicroSD kart yuvası və 3,5 mm ölçülü audio girişi daxildir. Simsiz bağlantı üçün Wi-Fi 6 və Bluetooth 5.1 dəstəklənir.

    “Packard Bell” alıcıların diqqətini ilk növbədə dizaynla çəkməyə çalışır. Təqdim olunan “DotBook 14” parlaq narıncı korpusa və ağ rəngli klaviaturaya sahibdir. “Escape”, “Enter”, “P” və “B” düymələri də narıncı rənglə seçilir. Noutbukda 2 quraşdırılmış stereo dinamik və videozənglər üçün 2 mikrofon yerləşdirilib.

    “DotBook 14” üçün gözlənilən qiymət 499 avro (təxminən 980 manat) təşkil edir. Bu məbləğə Avropa bazarında tətbiq olunan satış vergiləri də daxildir. Qiymət noutbukun sadə texniki göstəriciləri nəzərə alınanda yüksək görünə bilər, lakin model daha çox dizaynı ilə fərqlənir. “Packard Bell” dəqiq satış tarixini hələ açıqlamayıb.

    “Dot” ailəsi yalnız noutbukdan ibarət deyil. “Acer” sərgidə rəngarəng klaviatura və siçanlarla yanaşı, qulaqcıq və səsgücləndiricilər də nümayiş etdirib. Seriyaya sadə düyməli telefon, halqa formalı işıq, qida buğlayıcısı və vinil plastinka üçün pleyer də daxildir. Bu məhsulların qiyməti və Avropada satışa çıxacağı tarix hələ açıqlanmayıb.