Pebble 10 ildən sonra geri döndü: Time 2 təqdim edildi

    Pebble təxminən 10 illik fasilədən sonra Pebble Time 2 modeli ilə ağıllı saat bazarına geri dönüb. Yeni model Apple Watch və Wear OS saatları ilə funksiyaların sayına görə rəqabət aparmağa çalışmır. Əksinə, Pebble Time 2 smartfonu əvəz etmək yox, onun sadə bir köməkçisi olmaq üçün hazırlanıb. Saat bildirişləri göstərmək, musiqini idarə etmək, hava proqnozuna baxmaq və sadə tətbiqlər işlətmək kimi əsas funksiyalara fokuslanır. Bununla yanaşı, addım, yuxu və ürək döyüntüsünün izlənməsi kimi baza sağlamlıq funksiyaları da mövcuddur. Ancaq şirkət Pebble Time 2-ni tam funksiyalı fitness saatı kimi təqdim etmir.

    Cihaz 1,5 düymlük, 220 × 228 piksel təsvir ölçülü və 64 rəng göstərə bilən “always-on” e-paper sensor ekranla təchiz olunub. E-paper texnologiyasının əsas üstünlüklərindən biri ekranın günəş işığı altında rahat oxunması və az enerji sərf etməsidir. Pebble Time 2 daxilində aşağı enerji istehlakına hesablanmış SiFli prosessoru, 185 mAh batareya və 32 MB yaddaş yerləşir. Müasir ağıllı saatlarla müqayisədə bu göstəricilər olduqca sadə görünsə də, yüngül PebbleOS əməliyyat sistemi sayəsində saatın interfeysi sürətli işləyir.

    Modelin ən böyük üstünlüklərindən biri batareya müddətidir. Pebble istifadəçilərinin bir şarjla 20 gündən çox işləmə müddəti əldə etdiyini bildirir. Engadget-ın sınağında isə intensiv istifadə zamanı saat səkkiz gündə 100 faizdən 18 faizə düşüb. Bu nəticəyə əsasən, aktiv istifadə zamanı təxminən 9 günlük batareya müddəti gözləmək mümkündür. Pebble Time 2-nin başqa maraqlı tərəfi onun açıq ekosistemidir. PebbleOS və yeni cihazların proqram təminatı açıq mənbəlidir. İstifadəçilər minlərlə mövcud saat üzündən və tətbiqdən seçim edə, tərtibatçılar isə öz tətbiq və saat üzlərini yarada bilirlər.

    Təmir imkanları da nəzərə alınıb. Saatın arxa qapağı vintlərlə bərkidilib və texniki bacarığı olan istifadəçilər batareyanı dəyişə bilərlər. Model standart 22 mm-lik qayışları dəstəkləyir və USB-C kabelinə qoşulan kiçik maqnit adapter vasitəsilə şarj olunur. Bununla belə, Pebble Time 2 müasir ağıllı saatların bütün imkanlarını təqdim etmir. Cihazda GPS yoxdur, bəzi funksiyaların idarəsi mobil tətbiqdən deyil, birbaşa saatdan aparılır və hətta taymer və saniyəölçən kimi bəzi sadə alətlər üçün üçüncü tərəf tətbiqlərinə ehtiyac yarana bilər.