Philips Hue lampaları adi əmrlə sazlayan süni intellekt təqdim edib

    “Philips Hue” Berlində keçirdiyi illik tədbirdə ağıllı işıqlandırma üçün yeni süni intellekt funksiyasını təqdim edib. İstifadəçi lampaların nə vaxt və necə işləməli olduğunu tətbiqə adi cümlələrlə yaza biləcək. Tətbiq uyğun qaydaları özü quracaq. Beləliklə, düymələri və taymerləri ayrıca əl ilə tənzimləməyə ehtiyac qalmayacaq. Şirkət hesab edir ki, bu yenilik mürəkkəb işıq ssenarilərinin qurulmasını asanlaşdıracaq.

    Bu, “Philips Hue” məhsullarında süni intellektdən ilk istifadə deyil. Şirkət 2025-ci ildə yazılı təsvirə uyğun hazır işıq səhnəsi tapan və ya yeni səhnə yaradan köməkçini təqdim etmişdi. Bu il isə “Philips Hue Bridge Pro” üçün “SpatialAware” funksiyası istifadəyə verilib. Bu funksiya lampaların və işıq lentlərinin otaqda harada yerləşdiyini nəzərə alaraq işıq səhnəsini uyğunlaşdırır.

    “SpatialAware” hazırda yalnız “Bridge Pro” ilə işləyir. “Signify” rəhbəri Marco Merolla bildirib ki, həm funksiya, həm də cihaz istifadəçilər tərəfindən yaxşı qarşılanıb. Növbəti mərhələdə böyük dil modelləri, yəni adi dildə yazılan əmrləri anlayan sistemlər işə salınacaq. Bu sistemlər istifadəçinin davranışına uyğun daha mürəkkəb qaydalar qura biləcək. Məqsəd istənilən işıq mühitini sadə əmrlə yaratmaqdır.

    Tədbirdə televizordakı görüntüyə uyğun işıq effektləri yaradan “Philips Hue Play Screen Sync” sistemi də nümayiş etdirilib. Sistem HDMI bağlantısı əvəzinə kameradan yararlandığı üçün video mənbəyindən asılı deyil. “Sync Box 4K” daha sərfəli seçim kimi təqdim olunub. Bu model 2024-cü ilin sentyabrında satışa çıxarılan “Philips Hue Play Sync Box 8K” modelini tamamlayır. Hər 2 qutu və “Screen Sync” ayrıca “Philips Hue Bridge” almadan işləyə bilir.

    Bu cür quraşdırmada yalnız 1 işıq lentindən istifadə etmək mümkündür. Şirkətin məlumatına görə, bunun sayəsində televizora uyğun işıqlandırmanı bütöv sistem almadan sınaqdan keçirmək olar. Yeni məhsullar arasında “Liane” seriyasının 360 dərəcəli elastik işığı və “Signe” dirək lampası da yer alır. “Philips Hue” gələcəkdə xarici dizaynı və rəng keçidləri kimi işıq effektlərini eyni məhsulda daha yaxşı birləşdirməyi planlaşdırır.