Philips retro ruhunu geri qaytarır

    Technote.az “The Verge” platformasına istinadən bildirir ki, Philips şirkəti audio texnologiyaları istehsalının 100 illiyini qeyd etmək üçün 80-ci illərin cəsarətli və parlaq dizayn estetikasını yenidən gündəmə gətirən yeni Moving Sound kolleksiyasını təqdim edib. Keçmişdə Sony və Philips cihazlarında geniş istifadə olunan sarı və neon rəngli korpuslar bu dəfə müasir texnologiyalarla birləşdirilərək geri qayıdır.

    Yeni kolleksiyaya Bluetooth 5.5 və Auracast dəstəyi ilə təchiz edilmiş iki simsiz dinamik daxildir. Hər iki model IP67 qoruma sertifikatına malikdir, yəni suya və toza davamlıdır və qısa müddətli suya düşmələrdən zərər görmür. Dinamiklər 24 saata qədər batareya ömrü, neon rəngli idarəetmə düymələri və çoxrəngli LED işıqlandırma ilə seçilir. Kasset funksiyası geri qayıtmasa da, cihazların rəngli LCD ekranlarında fırlanan kaset lentlərini xatırladan animasiyalar və musiqi məlumatları göstərilir.

     Kolleksiyanın ən güclü modeli olan Tube dinamiki (€349.99) iki 5 düymlük woofer, iki tweeter və əlavə passiv radiatorlar sayəsində 140W səs gücü təqdim edir və daha güclü bas performansına fokuslanır. Daha kompakt Roller modeli (€179.99) isə 60W gücə malikdir və daşınma rahatlığı ilə fərqlənir.

   Moving Sound seriyasına iki növ simsiz qulaqlıq da daxildir. Ringo Duo (€34.99) yüngül on-ear qulaqlıqdır və köhnə kaset pleyerləri ilə verilən klassik modelləri xatırladır. Metal başlıq hissəsi, 40 mm sürücülər, Bluetooth və USB-C bağlantısı, dəyişdirilə bilən qulaq yastıqları və 26 saata qədər batareya ömrü təklif edir.

    Daha müasir funksiyalar istəyənlər üçün nəzərdə tutulmuş Buds simsiz qulaqlıqları (€79.99) isə altı mikrofon vasitəsilə aktiv səsboğma (ANC) və zənglər zamanı daha dəqiq səs ötürülməsi təmin edir. Qulaqlıqlar ANC söndürülmüş vəziyyətdə, şarj qutusundan istifadə ilə birlikdə 42 saata qədər işləyə bilir və qutunun üzərində animasiyalı ekran yerləşir.