Plaud eSIM-li süni intellekt qulaqlığını təqdim etdi

    Plaud süni intellekt vasitəsilə görüşləri və danışıqları qeydə alan cihazlarını yeni formata gətirir. Şirkət Plaud One adlı simsiz qulaqlığını təqdim edib. Yeni cihaz təkcə musiqi dinləmək üçün deyil, telefon danışıqlarını və görüşləri qeydə almaq, onları mətnə çevirmək və əldə olunan məlumat əsasında süni intellekt tapşırıqlarını yerinə yetirmək üçün hazırlanıb. Görünüş baxımından Apple AirPods-a bənzəyən Plaud One telefon danışıqlarını qeydə ala bilir. Qulaqlığın şarj qutusu isə ayrıca mikrofon kimi istifadə edilərək üzbəüz görüş və söhbətləri qeydə almağa imkan verir. Şirkətin məlumatına görə, qutu 5 metr məsafəyə qədər səsləri aydın şəkildə qeydə ala bilir.

    Plaud One-ın əsas fərqləndirici xüsusiyyətlərindən biri onun süni intellekt imkanlarıdır. Sistem qeydə alınmış söhbəti mətnə çevirdikdən sonra Plaud-un AI agentləri həmin məlumat əsasında müxtəlif işləri görə bilir. Məsələn, görüşdən sonra e-poçt hazırlamaq, sənəd və ya təqdimat yaratmaq mümkündür. Plaud-un AI sistemi Gmail, Google Calendar, Notion və Slack kimi xidmətlərlə də inteqrasiya oluna bilir. Beləliklə, cihaz sadəcə səs yazan və transkripsiya edən qulaqlıq deyil, görüş zamanı danışılanları sonradan konkret tapşırıqlara çevirən süni intellekt köməkçisi rolunu oynayır.

    Plaud One-ın ən maraqlı xüsusiyyəti isə şarj qutusunun eSIM dəstəkləməsidir. Plaud bildirir ki, bunun sayəsində istifadəçi telefon və ya kompüterdən istifadə etmədən, uzaqdan şirkətin AI agentlərinə tapşırıq verə biləcək. Şirkət hesab edir ki, gələcəkdə süni intellektə istənilən yerdən müraciət etmək üçün daim istifadəyə hazır interfeysə ehtiyac yaranacaq və qulaqlıqlar bunun üçün uyğun cihazlardan biridir.