Playdate konsolunda mümkün hesab edilməyən 3D oyun nümayiş etdirildi

    Müstəqil oyun tərtibatçısı Kristina Ramos Playdate əl oyun konsolu üçün hazırladığı yeni 3D oyun demosunu təqdim edib. Sosial şəbəkədə paylaşdığı görüntülər cihazın texniki məhdudiyyətlərinə baxmayaraq, Playdate-də üçölçülü qrafikanın mümkün olduğunu nümayiş etdirir. Demo görüntülərində oyunçu əvvəlcə binanın daxilində platformalar üzərində hərəkət edir, daha sonra isə dam örtüyünə çıxaraq Mirror's Edge üslubunu xatırladan parkur elementləri ilə açıq məkanda irəliləyir. Bu isə Playdate kimi sadə texniki göstəricilərə malik bir cihaz üçün diqqətçəkən nəticə hesab olunur.

    Kristina Ramos paylaşımında bildirib ki, əvvəlcə ona Playdate-də 3D qrafikanın mümkün olmadığı deyilmişdi. Daha sonra isə Mirror's Edge tipli açıq məkan səviyyələrinin hazırlana bilməyəcəyi iddia edilsə də, hazırladığı demo ilə bunun əksini sübut etdiyini vurğulayıb. Playdate son illərdə qeyri-adi idarəetmə mexanizmi və məhdud texniki imkanlarına baxmayaraq, yaradıcı oyun layihələri ilə seçilir. Tərtibatçılar cihazın imkanlarını maksimum dərəcədə genişləndirərək gözlənilməz layihələr hazırlamağa davam edirlər. Ramosun 3D demosu da bu istiqamətdə atılmış ən maraqlı addımlardan biri kimi qiymətləndirilir.