PlayStation dövründə yeni mərhələ

    Sony-nin sonuncu disk istehsalı zavodlarından biri artıq yeni fəaliyyət istiqamətinə keçməyə başlayıb. Avstriyanın Thalgau şəhərində yerləşən və şirkətin disk istehsalı üzrə əsas mərkəzi hesab olunan müəssisə gələcəkdə daha çox optik mikrolinzaların istehsalına fokuslanacaq. Şirkətin disk istehsalı bölməsinin rəhbəri Dietmar Tanzerin sözlərinə görə, zavod hazırda gündə təxminən 600 min disk istehsal edir və bunun yarısını PlayStation oyun diskləri təşkil edir. Lakin Sony hesab edir ki, 2028-ci ildə bu rəqəm indiki həcmin cəmi 10 %-nə düşəcək. Buna görə də şirkət zavodun 300 əməkdaşını yeni istehsal istiqamətinə uyğun olaraq yenidən hazırlamağı planlaşdırır.

    Əslində, bu keçid yeni qərar deyil. Sony son illərdə fiziki daşıyıcıların istehsalını mərhələli şəkildə azaldırdı. Şirkət ABŞ-dəki disk zavodlarını da illər əvvəl bağlayaraq bütün istehsalı Avstriyadakı müəssisədə cəmləşdirmişdi. Sony artıq Thalgau zavodunun transformasiyasına 30 milyon avro investisiya edib. Burada istehsal ediləcək optik mikrolinzalar gələcəyin bir çox texnologiyalarında istifadə oluna bilər. Şirkət nümayəndələri bu texnologiyanın avtomobil sənayesində də geniş tətbiq oluna biləcəyini bildirirlər. Məsələn, avtomobilin dönmə siqnalının birbaşa asfalt üzərinə proyeksiya edilməsi kimi həllər bu linzalar vasitəsilə mümkün ola bilər.

    Sony DADC-nin məlumatına görə, şirkət indiyədək ümumilikdə 26,4 milyarddan çox disk istehsal edib. Bunun 23 milyarddan çoxu isə 1983-2022-ci illər arasında ABŞ-nin Indiana ştatında hazırlanıb. Bu dəyişiklik bir daha göstərir ki, oyun sənayesində rəqəmsal satışların sürətlə artması fonunda fiziki oyun disklərinin dövrü tədricən sona yaxınlaşır.