PlayStation PC portlarından uzaqlaşır

    Technote.az “The Verge” platformasına istinadən bildirir ki, Sony-nin oyun bölməsi olan PlayStation strategiyasında mühüm dəyişiklik etməyə hazırlaşır. Bloomberg-in yaydığı məlumata görə, şirkət PS5 oyunlarını PC platformasına port etmək planlarını azaldır və hətta bəzi layihələri ləğv edir. Bildirilir ki, planlaşdırılan Ghost of Yōtei oyununun PC versiyası da artıq gündəmdə deyil.

    Bir neçə il əvvəl Sony 2025-ci ilə qədər oyunlarının yarısını PC və mobil platformalarda təqdim etməyi hədəflədiyini açıqlamışdı. Bu strategiya çərçivəsində şirkətin ən böyük franşizalarından olan The Last of Us Part I, Horizon Zero Dawn və God of War PC üçün buraxılmışdı. Hətta bu ay ərzində PlayStation tərəfindən dəstəklənən iki böyük PC layihəsi olan Marathon və Kojima Productions tərəfindən hazırlanan Death Stranding 2: On the Beach bazara çıxmağa hazırlaşır. Lakin Bloomberg-in hesabatına əsasən, PlayStation oyunlarının PC satışları gözlənilən səviyyədə olmayıb. Bu da Sony-nin strategiyasını yenidən gözdən keçirməsinə səbəb ola bilər. Şirkət məsələ ilə bağlı hələlik rəsmi açıqlama verməyib və planların gələcəkdə dəyişə biləcəyi də istisna edilmir.