Uzun müddət ərzində olmuş məlumat sızıntılarından sonra Xiaomi-nin POCO brendi POCO F5 smartfonunu təqdim edib. Hələ təqdimatdan öncə qeyd edilirdi ki, sözügedən smartfon yalnız Çində satılan Redmi Note 12 Turbo-nun qlobal versiyası rolunda çıxış edəcək. Belə də oldu. Xarici görünüşcə POCO F5 modeli Redmi Note 12 Turbo-ya bənzəyir. Onların hətta texniki özəllikləri də eynidir. Beləliklə POCO F5 smartfonu 120 Hz-lik təsvir yenilənməsinə sahib Full HD keyfiyyətli 6.67 düym AMOLED ekran ilə təchiz olunub. Ekranın yuxarı mərkəz hissəsində ön kamera üçün nəzərdə tutulmuş kiçik dairəvi çıxıntı yerləşdirilib.

    Barmaq izi skanı texnologiyası da birbaşa ekrana inteqrasiya edilib. Smartfon həmçinin özündə stereo səsgücləndiriciləri, naqilli qulaqlıqlar üçün 3.5 mm-lik audiogirişi və kontaktsız ödənişlər üçün NFC çipini birləşdirir. Əsas texniki göstəricilərə gəldikdə isə POCO F5 modeli Snapdragon 7+ Gen 2 prosessoru, 8/12 GB RAM, 256 GB daxili yaddaş həcmi, 64 MP + 8 MP + 2 MP üçlü arxa kamera, 32 MP-lik ön kamera və 67 vatt gücündə sürətli şarj texnologiyalı 5000 mAh enerji tutumlu batareya ilə təchiz olunub. Smartfon MIUI 14 interfeysli Android 13 vasitəsilə çalışır. POCO F5-in nə zaman satışa çıxacağı və hansı qiymətə satılacağı barəsində məlumat sabah veriləcək.