“Poco F9 Ultra” işıqlı “Bose” sabvuferi və 185 Hz ekranla gəldi (QİYMƏTİ)

    “Xiaomi” şirkətinin “Poco” brendi ikinci il ardıcıl “Bose” ilə əməkdaşlıq edərək “Poco F9 Pro” və “Poco F9 Ultra” smartfonlarını təqdim edib. Seriyanın əsas modeli “Poco F9 Ultra” işıqlı sabvuferi, çox parlaq ekranı və böyük batareyası ilə seçilir. “Poco F9 Pro” eyni səviyyəli ekrana sahib olsa da, daha sadə stereo dinamiklərlə təchiz olunub. Hər iki model performans və mobil oyun imkanlarına yönəlib.

    “Poco F9 Ultra” ötənilki modeldəki “Bose” markalı 2.1 səs sistemini saxlayır, lakin iki əsas dinamik yenilənib. Sabvufer əvvəlki kimidir, onun ətrafına isə ağ rəngli kiçik LED halqa əlavə olunub. İşıq zəng və bildiriş zamanı, həmçinin musiqi və oyunlarda ritmə uyğun işləyir. Telefonda “Bose” səs profilləri, tənzimlənən ekvalayzer və atıcı oyunlarında rəqib addımlarını önə çıxaran oyun səsi sistemi də var.

    “Poco F9 Ultra” modelində 6,9 düymlük OLED ekran quraşdırılıb. Ekranın pik parlaqlığı 10 000 nitdir, yenilənmə tezliyi isə maksimum 185 Hz təşkil edir. Lakin 185 Hz rejimi yalnız uyğun oyunlarda işləyəcək. Satış başlananda rejimi dəstəkləyən iyirmidən çox oyun arasında “Clash of Clans” və “GTA: Liberty City Stories” də olacaq. “Poco F9 Pro” modelinin 6,59 düymlük ekranı daha kiçikdir, amma parlaqlıq və sürət göstəriciləri eyni qalıb.

    “Poco F9 Ultra” modeli “Qualcomm” şirkətinin “Snapdragon 8 Elite Gen 5” prosessoru, maksimum 16 GB RAM və 1 TB yaddaşla təchiz edilib. Silisium karbon əsaslı batareyanın tutumu 8050 mAs, enerji doldurma gücü isə 100 Vt təşkil edir. Arxa kamera blokunda 200 meqapiksellik əsas sensor, 5 qat yaxınlaşdırmalı 50 meqapiksellik periskop kamera və 50 meqapiksellik ultra geniş bucaqlı kamera yerləşir. Şəkillərin emalında “Xiaomi” alqoritmlərindən istifadə olunur.

    “Poco F9 Pro” daha münasib qiymətli və müəyyən imkanları sadələşdirilmiş versiyadır. Onun “Bose” stereo dinamiklərində sabvufer və bildiriş üçün LED işığı yoxdur, batareyanın tutumu isə 6330 mAs təşkil edir. Telefoto və ultra geniş bucaqlı kameralar da “Poco F9 Ultra” ilə müqayisədə zəifdir. Model standart versiyadan bir qədər aşağı performans göstərən “Snapdragon 8 Elite Gen 5 V Series” prosessorundan istifadə edir.

    “Poco F9 Ultra” modelinin başlanğıc qiyməti 1099,90 avrodur (təxminən 2170 manat), ilkin satış kampaniyasında isə 829,90 avroya (təxminən 1640 manat) təklif olunur. “Poco F9 Pro” 899,90 avroya (təxminən 1780 manat) satışa çıxır, ilkin qiymət isə 739,90 avrodur (təxminən 1460 manat). “Poco” hər iki smartfon üçün dörd il əməliyyat sistemi yeniləməsi verəcək. Təhlükəsizlik yeniləmələri altı il davam edəcək.