Prego ailə söhbətlərini yazan “Connection Keeper” cihazını təqdim etdi

    Technote.az “The Verge” platformasına istinadən bildirir ki, ABŞ-nin məşhur sous brendi Prego ailə daxilində ünsiyyəti təşviq etmək üçün maraqlı bir yenilik təqdim edib. Şirkət “Connection Keeper” adlı, masa arxasında edilən söhbətləri qeyd edən xüsusi səs yazıcı cihaz hazırlayıb.

    Bu cihaz StoryCorps təşkilatı ilə əməkdaşlıq çərçivəsində yaradılıb. Məqsəd ailələrin telefonlardan uzaqlaşıb daha çox ünsiyyət qurmasını təşviq etmək və bu anları gələcək üçün qorumaqdır. Qeyd olunan səs yazıları istəyə bağlı olaraq Library of Congress American Folklife Center arxivində saxlanıla bilər.

    “Connection Keeper” dizayn olaraq iri makaron sousu qapağını xatırladır və istifadəsi olduqca sadədir. Cihazı masanın ortasına qoyub bir düymə ilə yazını başlatmaq kifayətdir. İki mikrofon vasitəsilə yüksək keyfiyyətli səs yazısı aparılır və 16GB yaddaş kartında təxminən 8 saatlıq qeyd saxlamaq mümkündür.

    Cihazda nə Wi-Fi, nə Bluetooth, nə də süni intellekt funksiyası var. Yazılar USB-C vasitəsilə kompüterə köçürülərək xüsusi platformaya yüklənə bilər və yalnız istifadəçinin icazəsi ilə paylaşılır.

    “Connection Keeper” məhdud sayda, 100 ədəddən az istehsal olunacaq və 27 aprel tarixindən etibarən 20 dollara satışa çıxarılacaq. Paketə həmçinin Prego sousu, spagetti və söhbət mövzuları olan kartlar da daxil ediləcək.