Prime Day 2026 başlayır

    Amazon şirkəti 2026-cı il üçün ən böyük alış-veriş kampaniyalarından biri olan Prime Day tədbirinin tarixlərini açıqlayıb. Şirkətin verdiyi məlumata görə, Prime Day bu il 23–26 iyun tarixlərində keçiriləcək. Beləliklə, kampaniya ötən illə müqayisədə bir neçə həftə daha erkən başlayacaq. Ənənəvi olaraq yalnız Amazon Prime abunəçiləri üçün nəzərdə tutulan Prime Day çərçivəsində istifadəçilərə elektronika, geyim, məişət texnikası, oyun məhsulları və digər kateqoriyalar daxil olmaqla 35-dən çox sahədə xüsusi endirimlər təqdim ediləcək.

    Amazon son illərdə Prime Day tədbirinin müddətini uzadıb. Belə ki, 2024-cü ildə kampaniya cəmi 48 saat davam etdiyi halda, ötən il bu müddət 4 günə çatdırılmışdı. Şirkət bu il də eyni strategiyanı davam etdirərək istifadəçilərə endirimlərdən yararlanmaq üçün daha çox vaxt verəcək Bununla yanaşı, bəzi məhsullar yalnız müəyyən günlərdə endirimlə satışa çıxarılacaq. Buna görə də istifadəçilərin maraqlandıqları məhsulları əvvəlcədən izləmələri tövsiyə olunur. Xüsusilə yüksək tələbat olan məhsulların ehtiyatları qısa müddətdə tükənə bilər.

    Amazon Prime Day kampaniyası həm də şirkətin Prime abunə xidmətinə yeni istifadəçilər cəlb etməsi üçün vacib vasitələrdən biri hesab olunur. Hazırda illik 139 dollar olan Prime üzvlüyü istifadəçilərə sürətli çatdırılma, video və musiqi xidmətləri ilə yanaşı, xüsusi endirimlərdən də yararlanmaq imkanı verir.