Qandakı şəkəri ölçə biləcək Apple Watch 2027-ci ilə qədər təqdim oluna bilər

     GF Securities analitiki Jeff Pu-nun təqdim etmiş olduğu məlumata əsasən Apple 2027-ci ilə qədər qandakı şəkər səviyyəsini ölçə bilən Apple Watch modelini təqdim edə bilər. Bu, xüsusilə şəkərli diabet xəstəliyindən əziyyət çəkənlər üçün taxıla bilən cihazların inkişafında böyük əhəmiyyət daşıyan mühüm addım olacaq. Çünki bu istifadəçilər daim qandakı şəkər səviyyəsini izləməyə məcburdurlar.

     Lakin funksiyanın necə reallaşdırılacağı ilə bağlı dəqiq detallar hələlik müəmmalı olaraq qalır. Daha əvvəl Bloomberg xəbər vermişdi ki, Apple bu məqsədlə bir sensor prototipi hazırlayıb və həmin prototip “proof of concept" mərhələsinə çatıb, yəni işlək olduğu sübuta yetirilib. Ancaq əsas problem bu avadanlığın ölçüsüdür. O, mövcud Apple Watch gövdələri üçün həddindən artıq böyükdür.

     Bu, xüsusilə daha iri olsa da məhdud daxili sahəyə sahib Ultra versiyaları üçün daha ciddi problemdir. Bununla yanaşı, Vision Air və yeni ağıllı eynəyin mümkün təqdimatı ilə bağlı da məlumatlar yayılıb. Bu isə 2027-ci ilin Apple üçün sağlamlıq və artırılmış reallıq sahəsindəki ekosisteminin inkişafında açar il ola biləcəyini göstərir. Lakin bu məhsulların heç biri hələlik rəsmi şəkildə təsdiqlənməyib, buna görə də bu məlumatlara ehtiyatla yanaşmaq tövsiyə olunur.