Qatlana bilən Galaxy Z Fold 5-in ekranı toz keçirtməz xüsusi örtüyə sahib ola bilər

    Samsung şirkətinin bu il ərzində təqdim edəcəyi yeni qatlana bilən Galaxy Z Fold 5 və Z Flip 5 smartfonları barəsində yeni məlumat ortaya çıxıb. Verilmiş yeni məlumata əsasən Samsung öz yeni qatlana bilən smartfonlarını daha qorunan tərzdə reallaşdırmaq niyyətindədir. Söhbət, smartfonların tozdan qorunmaları özəlliyindən gedir. Məlumata əsasən Samsung bu məsələdə toz keçirtməyən sertifikatlaşdırılmış xüsusi ekran örtüyündən istifadə etməyi planlaşdırır. Bu, smartfonlarda istifadə ediləcək yeni şarnir konstruksiyası hesabına mümkün olacaq.

    Ortaya çıxmış bu məlumatda söhbət, yalnız Galaxy Z Fold 5-dən gedir. Lakin heç istisna deyil ki, Galaxy Z Flip 5 də toz keçirtməyən xüsusi ekran örtüyünü özündə birləşdirəcək. Qeyd etmək lazımdır ki, keçən il təqdim edilmiş Galaxy Z Fold 4 və Z Flip 4 modelləri sudan qorunma özəlliyini əldə etmişdilər. Buna görə də növbəti məntiqi addım kimi yeni smartfonlarda tozdan qorunma özəlliyinin reallaşdırılması olardı. Galaxy Z Fold 5 ilə Z Flip 5-in avqust ayında baş tutacaq Galaxy Unpacked tədbiri çərçivəsində təqdim ediləcəyi gözlənilir.