Qatlana bilən Honor Magic V2 smartfonu təqdimata hazırlaşır

    2 ay bundan öncə Honor şirkəti Honor Magic Vs adlı qatlana bilən smartfonunu təqdim etmişdi. Daha sonra isə məlumat ortaya çıxdı ki, şirkət Magic V2 adlı yeni qatlana bilən smartfon üzərində çalışır. Görünür, onun təqdimatı yaxın zamanda baş tutacaq. Belə ki, sözügedən qatlana bilən smartfon iki sertifikatlaşdırma agentliyində sertifikatlaşdırmadan keçib. Təəssüflər olsun ki, Magic V2-nin texniki özəllikləri barəsində məlumat verilməyib.

    Sadəcə olaraq qeyd edilib ki, Honor-un yeni qatlana bilən smartfonu 66 vatt gücündə sürətli şarj texnologiyasının dəstəyinə sahib olacaq. İnsayderlərin sözlərinə əsasən Magic V2 smartfonu iki ədəd OLED LTPO ekran ilə təchiz olunacaq və əsas ekran 2K keyfiyyətində olacaq. Bununla yanaşı yeni qatlana bilən smartfonun 16 GB RAM, 512 GB daxili yaddaş həcmi və 5000 mAh enerji tutumlu batareya ilə təchiz olunacağı gözlənilir. Smartfonun Snapdragon 8 Gen 2 prosessoru vasitəsilə çalışacağı güman edilir.