Qatlana bilən iPhone-a görə digər iPhone-ların buraxılış müddətində dəyişiklik ola bilər

     2026-cı ildə ilk qatlana bilən iPhone modelinin təqdim olunacağı gözlənilir - bu, Apple üçün o qədər mühüm hadisə olacaq ki, şirkət cihazlarının buraxılış konsepsiyasını yenidən nəzərdən keçirə bilər. The Information saytının məlumatına görə, Apple qatlana bilən smartfon üçün marketinq kampaniyasına yer açmaq məqsədilə iPhone-un adi buraxılış cədvəlində əhəmiyyətli dəyişikliklər edəcək. Gözlənilir ki, 2026-cı ilin payızında Apple iPhone 18 Pro, iPhone 18 Pro Max, iPhone 18 Air və qatlana bilən iPhone modelini təqdim edəcək.

     Standart iPhone 18 və iPhone 16E modelini əvəz edəcək büdcə variantı isə yalnız 2027-ci ilin yazında satışa çıxarılacaq. Beləliklə, satışa əvvəlcə bahalı premium modellər çıxarılacaq, daha sərfəli modellər isə 6 ay sonra bazara təqdim olunacaq. İnsayderlərin məlumatına görə, Apple-ın qatlana bilən cihazında daxili ekranın ölçüsü 7.8 düym olacaq və onun üzərində qatlanma izi görünməyəcək. Xarici ekranın ölçüsü isə 5.5 düym təşkil edəcək.

     Qatlanmış vəziyyətdə cihazın qalınlığı 9-9.5 mm, açıq halda isə 4.5-4.8 mm olacaq. Qatlana bilən iPhone titandan hazırlanmış gövdəyə, maye metaldan hazırlanmış şarnir konstruksiyasına, ikili arxa kameraya və tək ön kameraya sahib olacaq. Cihazın Face ID texnologiyası ilə təchiz olunacağı, Touch ID-nin isə istifadə edilməyəcəyi ehtimal olunur. Qatlana bilən iPhone-un qiymətinin 2100-2300$ aralığında olacağı gözlənilir ki, bu da onu öz sinfində ən bahalı modellərdən birinə çevirəcək.

Mənbə: The Information