Qatlana bilən iPhone iki özəlliyi ilə seçiləcək

     2026-cı ildə ilk qatlana bilən iPhone modelinin təqdim olunacağı gözlənilir. Aydındır ki, Apple bu cihazın hazırlanmasına məsuliyyətlə yanaşır və bu sahədə bazar lideri olmağı planlaşdırır. İnsayderlər bu smartfonla bağlı bir neçə dəfə məlumat paylaşmış və artıq onun əsas xüsusiyyətləri məlum olmuşdur. Bloomberg saytının məşhur insayderi Mark Gurman qeyd edib ki, qatlana bilən iPhone rəqiblərinə qarşı iki əsas üstünlüyə malik olacaq. Onun məlumatına görə, Apple ekranlar arasındakı qatlanma hissəsini demək olar ki, görünməz etmək üçün böyük səylər göstərir, bu isə istifadə zamanı daha rahat təcrübə yaradacaq.

     İkinci üstünlük isə çox möhkəm şarnir konstruksiyası olacaq - daha əvvəl çinli analitik Ming-Chi Kuo bu şarnir konstruksiyasının maye metaldan hazırlanacağını bildirmişdi. Hazırda digər brendlər öz cihazlarının istehsalında maye metal istifadə etmir və Apple-ın bu ideyasının uğurlu və ya uğursuz olması bu istiqamətin inkişafına əhəmiyyətli təsir göstərə bilər. Xatırladaq ki, maye metal yüksək möhkəmlik həddinə və bərpa qabiliyyətinə malikdir, həmçinin yüksək aşınma müqavimətinə görə qatlana bilən smartfonların şarnir konstruksiyalarında istifadə üçün ideal material hesab olunur. Gözlənilir ki, qatlana bilən iPhone-un satış qiyməti 2100-2300$ aralığında olacaq və bu da onu öz kateqoriyasında ən bahalı modellərdən birinə çevirəcək.

     Müqayisə üçün, Samsung Galaxy Fold 6 1900$-a, Google Pixel 9 Pro Fold isə 1800$-a satılır. Qeyd edək ki, iPhone 16 Pro Max modelinin start qiyməti isə 1199$-dır. Ming-Chi Kuo-nun əvvəlki insayder məlumatlarına görə, qatlana bilən iPhone-un daxili ekranının ölçüsü 7.8 düym olacaq və burada heç bir qatlanma izi görünməyəcək, xarici ekran isə 5.5 düym ölçüsündə olacaq. Qatlanmış vəziyyətdə cihazın qalınlığı 9-9.5 mm, açıq vəziyyətdə isə 4.5-4.8 mm olacaq. Qatlana bilən iPhone titan ərintisindən hazırlanmış gövdəyə, ikili arxa kameraya və tək ön kameraya sahib olmalıdır. Apple bu cihazın kütləvi istehsalına 2026-cı ilin dördüncü rübündə başlamağı planlaşdırır.

Mənbə: Bloomberg