Evan Blass adlı məşhur insayder Google şirkətinin ilk qatlana bilən smartfonunun render fotolarını və texniki özəlliklərini təqdim edib. Google şirkətinin Pixel Fold adını əldə edəcəyi güman edilən ilk qatlana bilən smartfonunun daxili ekranı geniş çərçivələrə sahib olacaq. Bununla belə smartfon yeni növ şarnir konstruksiyasını və təkmilləşdirilmiş çəkiliş imkanlarını əldə edəcək. Son məlumat sızıntılarına əsasən Pixel Fold 120 Hz-lik təsvir yenilənməsinə sahib iki ədəd OLED ekran ilə təchiz olunacaq. Smartfonun daxili ekranı 7.6 düym (1840x2208 piksel keyfiyyətli), xarici ekranı isə 5.8 düym (1080x2092 piksel keyfiyyətli) təşkil edəcək.

    Xarici ekran həmçinin Gorilla Glass Victus qoruyucu şüşəsi ilə əhatə olunacaq. Qatlana bilən smartfon Pixel 7 smartfonlarının sahib olduqları prosessor vasitəsilə çalışacaq. Söhbət, Tensor G2-dən gedir. Bundan əlavə olaraq Pixel Fold 12 GB RAM, 256/512 GB daxili yaddaş həcmi və 48 MP (f/1.7 diafraqma, optik stabilizasiya) + 10.8 MP (f/2.2 diafraqma) + 10.8 MP (f/3.05 diafraqma, 5 qat optik zoom, 20 qat rəqəmsal zoom) üçlü arxa kamera ilə təchiz olunacaq. Smartfon iki ədəd ön kameraya sahib olacaq. Onlardan biri xarici ekran, digəri isə daxili ekran üzərində yerləşəcək.

    Məlumatda qeyd edilib ki, ön kameralardan biri 9.5 MP-lik, digəri isə 8 MP-lik olacaq. Pixel Fold özündə 30 vatt gücündə sürətli şarj texnologiyalı 4821 mAh enerji tutumlu batareyanı birləşdirəcək. Bununla yanaşı smartfonun gövdəsi IPX8 standartı üzrə sudan qorunacaq və stereo səsgücləndiricilərə sahib olacaq. Barmaq izi skanı texnologiyası isə yandırıb/söndürmə düyməsinə inteqrasiya ediləcək. Evan Blass-ın məlumatlarına əsasən Pixel Fold-un 256 GB yaddaşa sahib versiyası 1799$-a, 512 GB yaddaşa sahib versiyası isə 1919$-a satılacaq. Qeyd etmək lazımdır ki, Pixel Fold-un 10 may tarixində start götürəcək Google I/O 2023 konfransı çərçivəsində təqdim olunacağı gözlənilir.