Dünən məlumat ortaya çıxdı ki, Xiaomi şirkəti Mix Flip adlı qatlana bilən qapaqlı smartfon üzərində çalışır. Belə ki, sözügedən smartfonun adı IMEI məlumatlar bazasında ortaya çıxıb. Xiaomi-nin Flip form-faktoruna sahib qatlana bilən smartfon üzərində çalışması barəsində məlumatlar ilk dəfə yay fəslinin əvvəlində ortaya çıxmışdı. Həmin vaxtda qeyd edilmişdi ki, Flip form-faktoruna sahib olan qatlana bilən smartfonların bazarda uğurlu olmaları səbəbilə Xiaomi də bu cür smartfonu satışa çıxartmağı qərara alıb.

    İndi isə Xiaomi Mix Flip-in sxematik fotosu internetdə ortaya çıxıb. Ortaya çıxmış sxematik fotodan da görmək olar ki, Xiaomi Mix Flip üfüqi şəkildə yerləşdirilmiş arxa kamera sahəsinə sahib olacaq. Bununla yanaşı smartfon böyük ölçülü xarici ekran ilə təchiz olunacaq. Çox güman ki, Xiaomi Mix Flip ya Snapdragon 8 Gen 2 ya da Snapdragon 8 Gen 3 prosessoru vasitəsilə çalışacaq. Sözügedən qatlana bilən qapaqlı smartfonun bu ilin sonunda və ya gələn ilin əvvəlində təqdim olunacağı gözlənilir.