Samsung şirkətinin bu il yeni qatlana bilən smartfonlarından biri olacaq Galaxy Z Fold 5 barəsində məlumatlar ortaya çıxmağa davam edir. Bu dəfə yeni məlumatları Ice Universe ləqəbli məşhur insayder təqdim edib. İnsayderin sözlərinə əsasən Samsung sözügedən qatlana bilən smartfonun dizaynını artıq təsdiqləyib. Məlumata əsasən Galaxy Z Fold 5 xarici görünüşcə hal hazırda aktual olan Galaxy Z Fold 4-dən heç də fərqlənməyəcək. Bununla yanaşı insayder bildirib ki, yeni qatlana bilən smartfon Galaxy Z Fold 4-ün xarici ekranını əldə edəcək.

    Bu isə o deməkdir ki, Galaxy Z Fold 5 modeli 6.2 düym AMOLED ekran ilə təchiz olunacaq. İnsayder ekranın hansı göstəricidə təsvir yenilənməsini əldə edəcəyini söyləməyib. Lakin çox güman ki, Galaxy Z Fold 5-in xarici ekranı 120 Hz-lik təsvir yenilənməsini dəstəkləyəcək. Prosessora gəldikdə isə smartfon Snapdragon 8 Gen 2 vasitəsilə çalışacaq. Galaxy Z Fold 5-in Galaxy Z Flip 5 ilə birlikdə avqust ayında baş tutacaq Galaxy Unpacked tədbiri çərçivəsində tədqim ediləcəyi gözlənilir.