Qatlana bilən Samsung Galaxy Z Fold 5-in yeni real fotoları ortaya çıxıb

    Samsung öz yeni qatlana bilən smartfonları Galaxy Z Fold 5 ilə Z Flip 5-i 26 iyul tarixində baş tutacaq Galaxy Unpacked tədbirində təqdim edəcək. İndi isə Galaxy Z Fold 5-in yeni real fotoları ortaya çıxıb. Fotolardan da görmək olar ki, Galaxy Z Fold 4 ilə müqayisədə Galaxy Z Fold 5 xarici görünüşcə iki fərqli özəllik əldə edəcək. Birinci fərqləndirici özəllik ondan ibarət olacaq ki, yeni smartfonda işıqlandırma sistemi kamera sahəsinin sağ hissəsində yerləşəcək. Galaxy Z Fold 4-də işıqlandırma sistemi kamera sahəsinin alt hissəsində yerləşir.

    İkinci bir özəllik isə ondan ibarət olacaq ki, qatlanmış vəziyyətdə Galaxy Z Fold 5-in ekranları arasında boşluq qalmayacaq. Lakin digər tərəfdən görmək olar ki, yeni smartfonun daxili ekranı üzərində qatlanma izi olduğu kimi qalacaq. Son məlumat sızıntılarına əsasən Galaxy Z Fold 5 smartfonu 120 Hz-lik təsvir yenilənməsinə sahib 7.6 düym daxili ekran, 6.2 düym xarici ekran, Snapdragon 8 Gen 2 prosessoru, 12 GB RAM, 256/512 GB/1 TB daxili yaddaş həcmi, 50 MP + 12 MP+ 12 MP üçlü arxa kamera və 25 vatt gücündə sürətli şarj texnologiyalı 4400 mAh enerji tutumlu batareya ilə təchiz olunacaq.