Qatlana bilən Xiaomi Mix Fold 3 barəsində məlumatlar verilib

    Heç sirr deyil ki, Xiaomi hal hazırda yeni qatlana bilən smartfon üzərində çalışır. Söhbət, Xiaomi Mix Fold 3-dən gedir. İnsayderlər sözügedən yeni qatlana bilən smartfon barəsində məlumatlar təqdim ediblər. İnsayderlərin sözlərinə əsasən Mix Fold 3 hal hazırda şirkət daxilində testlərdən keçir və o, Babylon və ya M18 kod adına sahibdir. Məlumatda qeyd edilib ki, Mix Fold 3 xarici görünüşcə Mix Fold 2-yə bənzəyəcək və hal hazırda Samsung tərəfindən hazırlanan Galaxy Z Fold 5-dən daha nazik olacaq. İnsayderlər bildiriblər ki, Mix Fold 3 tam açıq vəziyyətdə 0.5 mm, qapalı vəziyyətdə isə 2.2 mm qalınlığa sahib olacaq.

    Bundan əlavə olaraq insayderlər smartfonun bəzi texniki göstəriciləri barəsində də məlumat veriblər. Onların sözlərinə əsasən Mix Fold 3 smartfonu 6.56 düym xarici ekrana və 8.02 düym daxili ekrana sahib olacaq. Smartfon dördlü arxa kamera ilə təchiz olunacaq və əsas kamera obyektivi Sony IMX989 olacaq. Digər 3 kamera obyektivinə gəldikdə isə onların hər biri 50 MP-lik Sony IMX858 olacaq. Xiaomi Mix Fold 3-ün Snapdragon 8 Gen 2 prosessoru vasitəsilə çalışacağı güman edilir. Smartfonun nə zaman təqdim olunacağı bilinmir.