Qatlanan telefon yarışında yeni mərhələ!

    Technote.az “The Verge” platformasına istinadən bildirir ki, Samsung, Apple-ın uzun müddətdir gözlənilən qatlanan iPhone modelini təqdim etməsindən əvvəl bazarda mövqe tutmağa hazırlaşır. Cənubi Koreyanın ET News nəşrinin məlumatına görə, Samsung 2026-cı ildə “Wide Fold” adlanan yeni qatlanan smartfonunu təqdim etməyi planlaşdırır.

    Məlumata əsasən, “Wide Fold” modeli qatlandıqda 5,4 düym, açıldıqda isə 7,6 düym ölçülü OLED ekrana sahib olacaq. Qurğunun əsas fərqləndirici xüsusiyyəti isə açıq vəziyyətdə 4:3 ekran nisbətinə malik olmasıdır. Bu format daha çox “passport” tipli dizayna uyğun gəlir. Bu məlumatlar ötən həftə The Information tərəfindən yayılan hesabatla da üst-üstə düşür. Həmin xəbərə görə, Apple-ın ilk qatlanan iPhone-u 5,3 düymlük xarici, 7,7 düymlük daxili ekranla təchiz ediləcək və ən böyük iPad modellərinə bənzər 4:3 nisbətinə sahib olacaq. Bloomberg-dən Mark Gurman isə daha əvvəl bildirmişdi ki, bu cihaz dizayn baxımından iki iPhone Air-in birləşmiş formasını xatırladacaq.

    Həm Samsung-un “Wide Fold” modelinin, həm də Apple-ın qatlanan iPhone-unun 2026-cı ilin payızında təqdim ediləcəyi gözlənilir. Qeyd edək ki, 4:3 format mətn oxuma və yaradıcılıq işləri üçün ideal olsa da, video izləyərkən ekranın yuxarı və aşağı hissəsində qara zolaqların yaranmasına səbəb olur. Bu problem hazırda Samsung-un Z Fold seriyasında da hiss olunur.