Qida allergiyası olanlar üçün yeni dövr

    Qida allergiyası və ya çölyak xəstəliyi olan insanlar üçün restoranlardakı yemək bəzən sadəcə narahatlıq yox, real həyat riski daşıyır. Technote.az “Mashable” platformasına istinadən bildirir ki, CES 2026 çərçivəsində təqdim olunan yeni portativ cihaz isə bu riski minimuma endirməyi hədəfləyir.

    Fransız startapı Allergen Alert tərəfindən hazırlanmış “mini lab” adlı bu cihaz masa üzərində yeməkləri bir neçə dəqiqə ərzində allergenlərə və qlütenə görə test etməyə imkan verir. Batareya ilə işləyən və adi bir kitab ölçüsündə olan qurğu, peşəkar laboratoriya analizlərinin bütün mərhələlərini avtomatlaşdırılmış və kiçildilmiş formada həyata keçirir. İstifadə prosesi olduqca sadədir: yeməkdən kiçik bir nümunə götürülərək birdəfəlik test paketinə yerləşdirilir və cihaz allergenin olub-olmamasını demək olar ki, dərhal göstərir. Bu isə istifadəçilərə restorana tam etibar etmədən yeməklərini özləri yoxlamaq imkanı yaradır.

    Allergen Alert-in təsisçisi və CEO-su Benedicte Astier bu ideyanın şəxsi təcrübədən yarandığını bildirir. Onun sözlərinə görə, süd allergiyası səbəbindən qızının anafilaktik şok keçirməsi bu texnologiyanın əsas motivasiyası olub. Astier qeyd edir ki, məqsəd allergiyası olan insanlara “əlavə təhlükəsizlik kəməri” təqdim etməkdir. Mini lab layihəsi Astier-in daha əvvəl çalışdığı bioloji diaqnostika şirkəti bioMérieux-də intrapreneur proqramı çərçivəsində formalaşıb. Startap 2025-ci ilin oktyabrında 3,6 milyon avro investisiya cəlb edib.