Qlobal ağıllı eynək tədarükü 110% artıb

     Counterpoint statistikasına görə, 2025-ci ilin birinci yarısında dünyada ağıllı eynək tədarükü illik müqayisədə 110% artıb. Müsbət dinamikanın əsas səbəbləri Ray-Ban Meta ağıllı eynəklərinə yüksək tələbat, eləcə də Xiaomi, TCL-RayNeo və bir neçə kiçik brend daxil olmaqla yeni oyunçuların bazara daxil olması olub. Birinci yarım ildə ümumi tədarükün 78%-i süni intellekt funksiyalı ağıllı eynəklərin payına düşüb. 2024-cü ilin birinci yarısında bu göstərici 46%, ikinci yarısında isə 66% idi. Yenə də artımın ən böyük səbəbi Ray-Ban Meta olub. İllik müqayisədə, süni intellektli eynəklər seqmenti 250%-dən çox artım göstərərək bu cihazların ümumi bazarını xeyli qabaqlayıb. Counterpoint analitikləri qeyd ediblər ki, Trump tərəfindən tətbiq olunan gömrük rüsumlarının yaratdığı qlobal texnologiya sektoru böhranı ağıllı eynəklər seqmentinə demək olar ki, təsir etməyib.

     Ən böyük uğuru Meta əldə edib - 2025-ci ilin ilk yarısında şirkətin ağıllı eynəklər üzrə qlobal bazar payı 73%-ə çatıb, tədarük həcmi isə 200%-dən çox artıb. Bu artım, Ray-Ban markasının sahibi və Meta-nın tərəfdaşı olan Luxottica-nı istehsalı artırmağa məcbur edib. Luxottica-nın Meta ilə birgə layihənin uğurundakı rolu böyükdür: şirkət yalnız istehsalı artırmayıb, həm də məhsul çeşidini genişləndirib və pərakəndə satışları stimullaşdırıb. Çinli istehsalçılar da fəallaşıblar: bazara RayNeo V3, Xiaomi AI Glasses, Thunderobot AURA və Kopin Solos AirGo V seriyası çıxıb. Əsl hadisə isə Xiaomi-nin yeniliyi olub - şirkət bütün ağıllı eynəklər bazarında dördüncü, süni intellekt modelləri seqmentində isə üçüncü yeri tutub, baxmayaraq ki, ilk yarım ildə satışda cəmi 1 həftə olub. Xiaomi bu uğurunu Çindəki marka pərəstişkarlarının dəstəyinə borcludur.

     Gözlənilir ki, şirkət proqram təminatı yeniləmələri ilə cihazın xüsusiyyətlərini təkmilləşdirəcək. Ağıllı audio eynəklər seqmentində Huawei, Amazon və Xiaomi-yə məxsus Mijia markalı məhsullar mövcuddur, lakin burada süni intellekt modellərinin məşhurluğunun artması səbəbindən geriləmə müşahidə olunur. Xiaomi AI Glasses və hələ satışa çıxmamış Alibaba Quark AI Glasses məhsullarında istehsalçılar ödəniş alətlərinin inteqrasiyası imkanını araşdırırlar - bu, istifadəçilərə küçədə alış-veriş və yemək sifarişlərində smartfonlardan asılılığı azaltmağa kömək edəcək. Meta və Luxottica Şimali Amerika, Qərbi Avropa və Avstraliyada mövqelərini möhkəmləndirib, Hindistan, Meksika və BƏƏ-də iştirakını genişləndiriblər. 2025-ci ilin ikinci yarısında bazara bir çox yeni model çıxacaq, o cümlədən yaxın zamanda təqdim edilən Oakley Meta və Alibaba-nın ağıllı eynəkləri. Bir neçə modelin isə payızda keçiriləcək Meta Connect tədbirində elan ediləcəyi gözlənilir, qeyri-rəsmi məlumatlara görə, Apple da öz modelinin üzərində işləyir.