Qlobal bazarda büdcəli Honor X5 Plus təqdim edilib

    Honor şirkəti qlobal bazarda Honor X smartfon seriyasının yeni büdcəli modelini təqdim edib. Söhbət, Honor X5 Plus-dan gedir. Sözügedən yeni smartfon böyük həcmli batareyası və ikili arxa kamerası ilə seçilir. Beləliklə Honor X5 Plus smartfonu 90 Hz-lik təsvir yenilənməsinə sahib HD+ keyfiyyətli 6.56 düym LCD ekran ilə təchiz olunub. Ekranın yuxarı mərkəz hissəsində ön kamera üçün nəzərdə tutulmuş damcı formalı çıxıntı yerləşdirilib. Barmaq izi skanı texnologiyası yandırıb/söndürmə düyməsinə inteqrasiya edilib.

    Smartfon özündə kontaktsız ödənişlər üçün NFC çipini və 3.5 mm-lik audiogirişi birləşdirir. Əsas texniki göstəricilər baxımından Honor X5 Plus smartfonu MediaTek Helio G36 prosessoru, 4 GB RAM, 64 GB daxili yaddaş həcmi (microSD dəstəkli), 50 MP + ToF arxa kamera, 5 MP-lik ön kamera və 10 vatt gücündə sürətli şarj texnologiyalı 5200 mAh enerji tutumlu batareya ilə təchiz olunub. Smartfon MagicOS 7.1 interfeysli Android 13 vasitəsilə çalışır. Honor X5 Plus-ın nə zaman və hansı qiymətə satışa çıxacağı barəsində məlumat verilməyib.