Xiaomi-nin Redmi brendi Avropa bazarında Redmi 12 adlı yeni büdcəli smartfonunu təqdim etməyə hazırlaşır. İndi isə Digital Chat Station ləqəbli məşhur insayder sözügedən smartfonun bəzi texniki özəlliklərini və render fotosunu təqdim edib. Təqdim edilmiş render fotodan da görmək olar ki, Redmi 12 smartfonu arxa paneldən iPhone 12 Pro-nu xatırladacaq. Bununla belə smartfon yastı ekran ilə təchiz olunacaq və ekranın yuxarı mərkəz hissəsində ön kamera üçün kiçik dairəvi çıxıntı yerləşəcək. İnsayder bildirib ki, smartfonun arxa paneli şüşə materialdan hazırlanacaq. Bundan əlavə olaraq məlumatda qeyd edilib ki, Redmi 12 smartfonu 90 Hz-lik təsvir yenilənməsinə sahib Full HD+ keyfiyyətli IPS ekrana, MediaTek Helio G88 prosessoruna, üçlü arxa kameraya və 67 vatt gücündə sürətli şarj texnologiyasının dəstəyinə sahib olacaq.