Redmi Note 13 smartfonları ürək döyüntüləri ritmini ölçə biləcəklər

    Xiaomi-nin Redmi brendi 21 sentyabr tarixində Redmi Note 13 smartfon seriyasını təqdim edəcək. Təqdimat müddəti yaxınlaşdıqca sözügedən smartfon seriyası barəsində daha çox məlumat ortaya çıxır. Verilmiş yeni məlumata əsasən təqdim olunacaq hər 3 Redmi Note 13 modelinin sahib olacağı AMOLED ekran ürək döyüntüsü ritmini ölçə biləcək. Bu məlumatı Redmi brendinin rəhbəri Lu Weibing təqdim edib.

    21 sentyabr tarixində təqdim ediləcək bütün Redmi Note 13 modelləri 1.5K keyfiyyətli AMOLED ekranla təchiz olunacaqlar. Məlumatda qeyd edilib ki, smartfonların ekranlarına inteqrasiya ediləcək barmaq izi skanı texnologiyası öz ənənəvi funksionallığı ilə yanaşı ürək döyüntüləri ritminin ölçülməsi imkanını da təqdim edəcək. Bundan əlavə olaraq məlum olub ki, smartfonların ekranlarındakı maksimal parlaqlıq səviyyəsi 1800 nit təşkil edəcək.