RODE büdcə dostu yeni video yayım sistemi təqdim etdi

    Technote.az “Engadget” platformasına istinadən bildirir ki, yeni video istehsal cihazını təqdim edib. Şirkətin yeni məhsulu olan Rodecaster Video Core canlı yayım və video istehsalını daha əlçatan etməyi hədəfləyir. Yeni model şirkətin flaqman cihazı olan Rodecaster Video və orta seqmentdə yerləşən Rodecaster Video S modelindən daha sadə və ucuz alternativ kimi bazara çıxarılır. Cihaz xüsusilə canlı yayım dünyasına yeni başlayanlar və ya artıq audio avadanlıqları olan, lakin video istehsalına keçmək istəyən istifadəçilər üçün nəzərdə tutulub.

    Rodecaster Video Core-un əsas fərqləndirici xüsusiyyətlərindən biri cihazın üzərində fiziki idarəetmə düymələrinin olmamasıdır. Bütün idarəetmə prosesi Rodecaster App vasitəsilə həyata keçirilir. Texniki baxımdan cihaz geniş bağlantı imkanları təqdim edir. Arxa paneldə 3 HDMI giriş, 1 HDMI çıxış, 4 USB-C portu, 2 ədəd 3.5 mm audio girişi və 2 Neutrik combo portu yerləşir. USB-C vasitəsilə uyğun video cihazları qoşaraq eyni anda 4 video mənbə istifadə etmək mümkündür. Bundan əlavə, Ethernet üzərindən şəbəkə kameraları da sistemə inteqrasiya oluna bilir.

    Mobil cihaz istifadəçiləri üçün də imkanlar yaradılıb. Rode Capture tətbiqi vasitəsilə iOS cihazından video görüntünü simsiz şəkildə sistemə qoşmaq mümkündür. Sistem həmçinin səs girişlərinə əsaslanaraq kameralar arasında avtomatik keçid edə bilir ki, bu da çoxkameralı yayım zamanı idarəetməni asanlaşdırır. Audio avadanlıqlarından istifadə edənlər üçün də inteqrasiya mövcuddur. Rodecaster Sync tətbiqi vasitəsilə Rodecaster Pro II və Rodecaster Duo kimi audio konsollarını Video Core ilə birləşdirmək mümkündür. Bu halda istifadəçilər audio və video idarəsini eyni masadan həyata keçirə bilirlər.

    Cihaz canlı yayımları birbaşa YouTube, Twitch və digər platformalara ötürə bilir. Videoları isə xarici yaddaş qurğusuna yazmaq mümkündür. Yeni proqram təminatı yeniləməsi sayəsində montaj üçün DaVinci Resolve proqramında istifadə edilə bilən EDL faylları da yaradılır. Bundan əlavə, sistem sosial şəbəkələrdən gələn kvadrat və ya qeyri-standart ölçülü videoları avtomatik şəkildə uyğunlaşdıraraq yayım üçün optimallaşdırır. Rodecaster Video Core artıq 599 dollar qiymət ilə ön sifarişə açılıb. Lakin cihazın dünya üzrə satışa nə vaxt çıxacağı hələlik açıqlanmayıb.